କୋରୋନା ଭାଇରସ୍ ଚିକିତ୍ସା ଲାଗି ଏକ ଆଣ୍ଟିବଡି ପରୀକ୍ଷଣରେ ଇସ୍ରାଏଲ ଏକ ‘ଉନ୍ନୀତ ପର୍ଯ୍ୟାୟ’ରେ ପହଞ୍ଚିବା ସହ‘ମହତ୍ତ୍ବପୂର୍ଣ୍ଣ ପ୍ରଗତି ହାସଲ’ କରିଛି ବୋଲି ଇସ୍ରାଏଲ୍ର ରାଷ୍ଟ୍ରଦୂତ କହିଛନ୍ତି । କିନ୍ତୁ ସେ ସ୍ପଷ୍ଟ କରିଦେଇଛନ୍ତି ଯେ, ପରୀକ୍ଷଣ ଠିକ୍ କେଉଁ ପର୍ଯ୍ୟାୟରେ ପହଞ୍ଚିଛି ଏବଂ ପରବର୍ତ୍ତୀ ସମୟରେ ଏହାକୁ କୋଭିଡ୍-19ର ପ୍ରତିରୋଧ ଲାଗି ପ୍ରତିଷେଧକ ଟିକା ଭାବରେ ବ୍ୟବହାର କରାଯାଇପାରିବ କି ନାହିଁ ତାହା ଏହି ସମୟରେ କହିବା କଷ୍ଟକର ।
ରାଷ୍ଟ୍ରଦୂତ ଡକ୍ଟର ରନ୍ ମଲ୍କା କହିଲେ, “ସରକାରୀ ସ୍ତରରେ ଆମେ ଉଭୟ ପକ୍ଷର (ଭାରତ ଏବଂ ଇସ୍ରାଏଲ) ବୈଜ୍ଞାନିକ ଏବଂ ବୃତ୍ତିଧାରୀମାନଙ୍କ ମଧ୍ୟରେ ସମନ୍ବୟ ସ୍ଥାପନ ସହିତ ସେମାନଙ୍କୁ ନିୟୋଜିତ କରି ଏକ ପ୍ରତିଷେଧକ ଟିକା କିମ୍ବା ଆଣ୍ଟିବଡି ବା ପ୍ରତିରୋଧକ ପିଣ୍ଡର ବିକାଶ ଦିଗରେ ସେମାନେ କିଭଳି ଏକତ୍ର କାମ କରିପାରିବେ କିମ୍ବା ଏକ ମିଳିତ ଉଦ୍ୟମ ଚଳାଇ ପାରିବେ ତାହା ଦେଖୁଛୁ । ଏହି ନିର୍ଦ୍ଦିଷ୍ଟ ଆଣ୍ଟିବଡି ହୁଏତ ପରବର୍ତ୍ତୀ ସମୟରେ ଏକ ପ୍ରତିଷେଧକ ଟିକା ରୂପେ ବ୍ୟବହୃତ ହୋଇପାରେ କିନ୍ତୁ ବର୍ତ୍ତମାନ ପାଇଁ ଏହା ଏକ ଟିକା ନୁହେଁ, ବରଂ ଶରୀରରେ ଭୂତାଣୁ ନାଶ କରିବା ଲାଗି ଉଦ୍ଦିଷ୍ଟ ଏକ ଔଷଧ ।”
ଏହି ବିଶ୍ବ ମହାମାରୀର ଏକ ସମାଧାନ ଖୋଜିବା ଲାଗି ଭାରତ ଏବଂ ଇସ୍ରାଏଲ ପରସ୍ପରକୁ ନିବିଡ଼ ସହଯୋଗ କରୁଛନ୍ତି ବୋଲି ସୂଚାଇ ଦେବା ସହିତ ରାଷ୍ଟ୍ରଦୂତ କହିଥିଲେ ଯେ, ଉଭୟ ଦେଶର ମିଳିତ ଉଦ୍ୟମରେ ସ୍ବଳ୍ପ ମୂଲ୍ୟର ଇନ୍କ୍ୟୁବେଟରରୁ ଆରମ୍ଭ କରି ଅନ୍ୟ ଉପକରଣ ଏବଂ ଯନ୍ତ୍ରପାତି ନିର୍ମାଣ ପର୍ଯ୍ୟନ୍ତ ପ୍ରାୟ 50ଟି ପ୍ରସ୍ତାବିତ ବିଷୟ ଉପରେ ଗବେଷଣା ଜାରି ରହିଛି । ବିଜ୍ଞାନ, ପ୍ରଯୁକ୍ତିବିଦ୍ୟା ଏବଂ ସ୍ବାସ୍ଥ୍ୟ କ୍ଷେତ୍ରରେ ଉଭୟ ଦେଶର ବିଶେଷଜ୍ଞମାନଙ୍କ ମଧ୍ୟରେ ସମନ୍ବୟ ସ୍ଥାପନ ସହିତ ତଥ୍ୟ ବିଶ୍ଳେଷଣରୁ ଆରମ୍ଭ କରି ଆର୍ଟିଫିସିଆଲ୍ ଇଣ୍ଟେଲିଜେନ୍ସ ପଦ୍ଧତିରେ ପାରସ୍ପରିକ ଉପଲବ୍ଧି ବିନିମୟ ପାଇଁ ଇସ୍ରାଏଲ ଏକ ସଂପର୍କ ସ୍ଥାପନ ବ୍ୟବସ୍ଥା ପ୍ରସ୍ତୁତ କରିଛି । ଜୋର ଦେଇ ସେ କହିଥିଲେ ଯେ, “ଏହି ସଙ୍କଟ ଭାରତ ଓ ଇସ୍ରାଏଲକୁ ଆହୁରି ନିକଟତର କରିଛି । ପରସ୍ପର ପ୍ରତି ଥିବା ବିଶ୍ବାସ ଓ ସମ୍ମାନ ଦୃଷ୍ଟିରୁ ଆମେ ଭାରତକୁ ଏକ ଘନିଷ୍ଠ ଏବଂ ମୂଲ୍ୟବାନ ବନ୍ଧୁ ରୂପେ ବିବେଚିତ କରୁ ।”
ପୂର୍ବରୁ, ସୋମବାର ଦିନ ଇସ୍ରାଏଲର ପ୍ରତିରକ୍ଷା ମନ୍ତ୍ରୀ ନାଫତାଲି ବେନେଟ୍ ଏକ ବିବୃତିରେ କହିଥିଲେ, “ଇସ୍ରାଏଲ ଇନଷ୍ଟିଚ୍ୟୁଟ୍ ଫର୍ ବାୟୋଲୋଜିକାଲ ରିସର୍ଚ୍ଚର ଗବେଷଣାରୁ ପ୍ରସ୍ତୁତ ଏହି ମନୋକ୍ଲୋନାଲ ନ୍ୟୁଟ୍ରାଲାଇଜିଂ ଆଣ୍ଟିବଡି, ସଂକ୍ରମିତ ବ୍ୟକ୍ତିଙ୍କ ଶରୀରରେ କୋରୋନା ଭାଇରସ୍କୁ ପ୍ରଭାବହୀନ କରିଦେଇପାରେ ।” ଇସ୍ରାଏଲ୍ ଇନ୍ଷ୍ଟିଚ୍ୟୁଟ୍ ଫର୍ ବାୟୋଲୋଜିକାଲ ରିସର୍ଚ୍ଚର ନିର୍ଦ୍ଦେଶକଙ୍କ ବକ୍ତବ୍ୟ ଉଦ୍ଧାର କରି ଏହି ବିବୃତିରେ କୁହାଯାଇଛି ଯେ, ଏହି ଆଣ୍ଟିବଡି ଫର୍ମୁଲାର ପେଟେଣ୍ଟ (ସ୍ବତ୍ବ ସଂରକ୍ଷଣ) କରାଯାଉଛି ଏବଂ ବହୁଳ ମାତ୍ରାରେ ଏହାର ଉତ୍ପାଦନ ଲାଗି ପରବର୍ତ୍ତୀ ସମୟରେ ଏକ ବିଶ୍ବସ୍ତରୀୟ ପ୍ରସ୍ତୁତକାରୀ ସଂସ୍ଥାକୁ ପ୍ରଦାନ କରାଯିବ । ଅନୁରୂପ ସଫଳତା ପାଇଛି ବୋଲି ନେଦରଲାଣ୍ଡ୍ସ୍ ମଧ୍ୟ ଦାବି କରିଛି ।
AJC(ଆମେରିକାନ ଜିୱିସ୍ କମିଟି)ର ଏକ ବାର୍ତ୍ତାଳାପ କାର୍ଯ୍ୟକ୍ରମରେ ଭାଗ ନେଇଥିବା ମନୋନୀତ ସାମ୍ବାଦିକମାନଙ୍କୁ ଡକ୍ଟର ମଲ୍କା କହିଥିଲେ ଯେ, ଯଦି ବହୁ ପରିମାଣରେ ଏହି ଆଣ୍ଟିବଡି ପ୍ରସ୍ତୁତ କରାଯାଏ, ତେବେ ତାହା କେବେ ହେବ ସେ ସଂପର୍କିତ ନିର୍ଦ୍ଦିଷ୍ଟ ବିବରଣୀ ଏ ପର୍ଯ୍ୟନ୍ତ ଜଣାପଡ଼ିନାହିଁ । ଏ ସଂପର୍କରେ ମନ୍ତବ୍ୟ ଦେଇ ରାଷ୍ଟ୍ରଦୂତ କହିଥିଲେ, “ମୁଁ ଜାଣିନି ଏହା ଠିକ୍ କେଉଁ ପର୍ଯ୍ୟାୟରେ ରହିଛି, କିନ୍ତୁ ଏହା ଏକ ଉନ୍ନୀତ ପର୍ଯ୍ୟାୟରେ ଅଛି । ଏହି ପ୍ରକ୍ରିୟା ଶେଷ ହେବା ପରେ ଏହାର ଉତ୍ପାଦନ ହୋଇପାରିବ ଏବଂ ସମସ୍ତଙ୍କ ଉପଯୋଗିତା ପାଇଁ ଉପଲବ୍ଧ କରାଯାଇପାରିବ ବୋଲି ଆଶା କରାଯାଉଛି ।
ଏ ସଂପର୍କରେ ମୁଁ ଯେତେ ଦୂର ପର୍ଯ୍ୟନ୍ତ ଜାଣିଛି, ତାହା ଏତିକି । ହୁଏତ ଏକ ପ୍ରତିଷେଧକ ଟିକା କିମ୍ବା ଔଷଧ, ଆଣ୍ଟିବଡି, ଆଣ୍ଟିଡୋଟ୍ ପ୍ରସ୍ତୁତ କରିବା ଲାଗି ଆମେ ବିଭିନ୍ନ ଉପାୟରେ, ବିଭିନ୍ନ ଉଦ୍ୟମ ଚଳାଇଛୁ । ଆମେ ଏହି ପ୍ରମୁଖ କ୍ଷେତ୍ରରେ କାର୍ଯ୍ୟରତ ଅଛୁ । ସଫଳତା ନ ପାଇଲା ପର୍ଯ୍ୟନ୍ତ ଆମେ ସଂକ୍ରମଣ ରୋକିବା ଲାଗି ଯାହା କରିପାରିବୁ ତାହା କରିବୁ ।” ଇସ୍ରାଏଲର 16000 ସଂକ୍ରମିତ ବ୍ୟକ୍ତିଙ୍କ ମଧ୍ୟରୁ 10000ରୁ ଅଧିକ ସଂପୂର୍ଣ୍ଣ ରୋଗମୁକ୍ତ ହୋଇଛନ୍ତି, ପ୍ରାୟ 5000 ଲୋକ ଏବେ ବି ସଂକ୍ରମିତ ଅବସ୍ଥାରେ ଅଛନ୍ତି ଏବଂ ସେମାନଙ୍କ ମଧ୍ୟରୁ ପ୍ରାୟ 70 ଜଣ ଆଇସିୟୁରେ ଚିକିତ୍ସିତ ହେଉଛନ୍ତି ଏବଂ ମୃତ୍ୟୁସଂଖ୍ୟା 230 ରହିଛି, ଯାହା କି ତୁଳନାତ୍ମକ ଭାବେ କମ୍ ବୋଲି ରାଷ୍ଟ୍ରଦୂତ ସୂଚନା ଦେଇଥିଲେ । ସେ କହିଲେ, ଦେଶ ଭିତରକୁ ଆସୁଥିବା ଆନ୍ତର୍ଜାତୀୟ ବିମାନ ଚଳାଚଳ ବନ୍ଦ କରିବା ଏବଂ ଲକ୍ଡାଉନ୍ ଲାଗୁ କରିବାରେ ଇସ୍ରାଏଲ ଅନ୍ୟତମ ପ୍ରଥମ ଦେଶ ଏବଂ ଏବେ ଜୀବନ ଓ ଜୀବିକା ମଧ୍ୟରେ ଭାରସାମ୍ୟ ରକ୍ଷା କରିବା ଲାଗି ଏହାକୁ କୋହଳ କରାଯାଉଛି ।