ନୂଆଦିଲ୍ଲୀ:କେନ୍ଦ୍ରର ଅଗ୍ନିପଥ ଯୋଜନାକୁ ନେଇ ଗୋଟିଏ ପଟେ ଆନ୍ଦୋଳନ ଜାରି ରହିଥିବା ବେଳେ ରାଜନୀତି ମଧ୍ୟ ଜାରି ରହିଛି । ବିରୋଧୀ କଂଗ୍ରେସ ସମେତ ଅନ୍ୟ କିଛି ଦଳ ମଧ୍ୟ ଏହି ନିଷ୍ପତ୍ତି ଉପରେ ପ୍ରଶ୍ନ ଉଠାଇ ସାରିଛନ୍ତି । ଆଜି (ଶନିବାର) ଏହାରି ମଧ୍ୟରେ କୋଭିଡ ଆକ୍ରାନ୍ତ ହୋଇ ହସ୍ପିଟାଲରେ ଚିକିତ୍ସାଧୀନ ଥିବା କଂଗ୍ରେସ ଅନ୍ତରୀଣା ଅଧ୍ୟକ୍ଷା ସୋନିଆ ଗାନ୍ଧୀ ଆନ୍ଦୋଳନରତ ସେନା ଆଶାୟୀଙ୍କ ଉଦ୍ଦେଶ୍ୟରେ ଏକ ବାର୍ତ୍ତା ଜାରି କରିଛନ୍ତି । ସୋନିଆଙ୍କ ପକ୍ଷରୁ ଦଳର ବରିଷ୍ଠ ନେତା ତଥା ମହାସଚିବ ଜୟରାମ ରମେଶ ଏହି ପ୍ରେସବାର୍ତ୍ତା ଜାରି କରିଛନ୍ତି ।
କେନ୍ଦ୍ର ସରକାରଙ୍କ ଏହି ନିଷ୍ପତ୍ତିକୁ ସମ୍ପୂର୍ଣ୍ଣ ଦିଶାହୀନ ଦର୍ଶାଇବା ସହ ସେନା ନିଯୁକ୍ତି ଆଶାୟୀଙ୍କୁ ସହାନୁଭୂତି ଜଣାଇଛନ୍ତି ସୋନିଆ । କୋଭିଡ କାରଣରୁ ଗତ 3 ବର୍ଷ ହେଲା ସେନାରେ ଭର୍ତ୍ତି ପ୍ରକ୍ରିୟା ବନ୍ଦ ରହିଛି । ସ୍ବାଭାବିକ ଭର୍ତ୍ତି ପରିବର୍ତ୍ତେ ଏପରି ଏକ ଚୁକ୍ତିଭିତ୍ତିକ ପ୍ରକ୍ରିୟା ନିଷ୍ପତ୍ତି ସୋନିଆ ସମାଲୋଚନା ମଧ୍ୟ କରିଛନ୍ତି । ସେହିପରି ବାୟୁସେନାରେ ଭର୍ତ୍ତି ପାଇଁ ପରୀକ୍ଷା ସରିଥିବା ବେଳେ ପରବର୍ତ୍ତୀ ପ୍ରକ୍ରିୟା ନେଇ ସରକାର କିଛି ସ୍ପଷ୍ଟ କରୁନାହାନ୍ତି । ଏପରି ସ୍ଥଳେ ପ୍ରସ୍ତୁତି କରିଥିବା ଆଶାୟୀଙ୍କ ଅବସ୍ଥା ସେ ବୁଝି ପାରୁଛନ୍ତି ବୋଲି ସୋନିଆ କହିଛନ୍ତି ।