एकाच दिवशी दोन धक्कादायक घटना; डॉक्टरची दवाखान्यात आत्महत्या तर.. तरूणीचा पाय घसरून मृत्यू - Satara Suicide News

Satara Suicide News : कराडमध्ये बुधवारी दोन वेगवेगळ्या घटनांमध्ये वैद्यकीय क्षेत्राशी संबंधित दोघांचा मृत्यू झाला. या घटनेमुळं वैद्यकीय क्षेत्रात खळबळ माजली आहे. दोन्ही घटना या संवेदनशील असल्यानं वरिष्ठ पोलीस अधिकारी कराडमध्ये तळ ठोकून होते.

सातारा Satara Suicide News : सध्या दोन धक्कादायक घटना कराडमध्येघडल्या आहेत. कराड तालुक्यातील ओंड गावात डॉक्टरने राहत्या घरातील दवाखान्यात आत्महत्या (Doctor Committed Suicide) केल्याची धक्कादायक घटना बुधवारी सकाळी उघडकीस आलीय. तर दुसऱ्या घटनेत पाय घसरून पडल्याने २२ वर्षांच्या तरूणीचा मृत्यू झाला आहे. ती वैद्यकीय अभ्यासक्रमाची विद्यार्थीनी होती.

खासगी सावकार, फायनान्स कंपनीचा तगादा :कराड तालुक्यातील ओंड गावात डॉ. हेमंत प्रभाकर रेळेकर (वय ५०) यांनी आपल्या दवाखान्यातच आत्महत्या केल्याची धक्कादायक घटना बुधवारी सकाळी उघडकीस आली आहे. ओंडोशी रस्त्यावर त्यांचे 'रेळेकर हॉस्पिटल' आहे. इमारतीच्या पहिल्या मजल्यावर ते आई, पत्नी, मुलगा आणि मुलगीसोबत राहात होते. खासगी सावकाराचे पैसे देण्यासाठी त्यांनी फायनान्स कंपनीकडून कर्ज घेतलं होतं. सावकार आणि कंपनीकडून पैशासाठी तगादा सुरू होता. त्यातूनच त्यांनी आत्महत्येचं पाऊल उचलल्याचा आरोप त्यांच्या पत्नीन केला आहे.

वैद्यकीय अभ्यासक्रमाच्या तरूणीचा मृत्यू : मूळची उत्तर प्रदेशमधील असणारी २२ वर्षीय तरूणी कराडच्या कृष्णा मेडिकलमध्ये वैद्यकीय अभ्यासक्रमाचे शिक्षण घेत होती. मलकापूरमधील सनसिटीमध्ये ती वास्तव्यास होती. मंगळवारी (३० जुलै) रात्री पाय घसरून पडल्याने ती गंभीररित्या जखमी होवून तिचा मृत्यू झाला. आरूषी मिश्रा, असं तिचं नाव आहे. याबाबतच कराड शहर पोलीस ठाण्यात नोंद झाली आहे.

पोलीस तपास सुरू :वैद्यकीय अभ्यासक्रमाच्या विद्यार्थिनीचा मृत्यू झाला आहे. या घटनेची नोंद पोलीस ठाण्यात झाली असून पोलीस तपास सुरू आहे, अशी माहिती कराडचे डीवायएसपी अमोल ठाकूर यांनी 'ईटीव्ही भारत'शी बोलताना दिली.

हेही वाचा -