यवतमाळ -सासरच्या मंडळींकडून होणाऱ्या छळाला कंटाळून विवाहितेने गळफास घेऊन आत्महत्या केल्याची घटना घडली. काजल विशाल काटकर(रा. चांदोरेनगर) असे मृत महिलेचे नाव आहे. सासरच्या मंडळीने तिला मारल्याचा आरोप मृत महिलेचा भाऊ जगदीश काळे यांनी शहर पोलीस ठाण्यात दिलेल्या तक्रारीत केला आहे. याप्रकरणी पोलिसांनी दोघांना अटक केली आहे.
सदर माहितीप्रमाणे, काजलचा विवाह 11 जुलै 2019 ला रितीरिवाजानुसार झाला होता. सासरच्या लोकांनी सुरुवातीचे काही दिवस तिला चांगले वागविले. मात्र, नंतर माहेरून ५ लाख रुपये आणण्यासाठी तिचा छळ सुरू केला. याबाबत काजलने माहेरी सांगितले मात्र, सर्व सुरळीत होईल, असे म्हणत माहेरच्यांनी तिची समजूत काढली. त्यानंतर दिवाळी आटोपून सासरी आल्यानंतर काजलने आत्महत्या केल्याची माहिती माहेरी देण्यात आली. आरोपींना अटक करण्यात यावी, या मागणीसाठी नातेवाईकांनी शहर पोलीस ठाण्यात धडक दिली. पोलिसांनी गुन्हा नोंद करून दोघांना अटक केली आहे. लग्नाच्या पाच महिन्यानंतर विवाहितेला आत्महत्या करावी लागल्याने हळहळ व्यक्त होत आहे.