यवतमाळ- लोकसभेच्या यवतमाळ - वाशिम मतदार संघात महायुतीच्या भावना गवळी पाचव्यांदा विजयी झाल्या. भावना गवळींनी प्रतिस्पर्धी काँग्रेसचे ज्येष्ठ नेते माणिकराव ठाकरे यांचा तब्बल 1 लाख 17 हजार 939 मताने पराभव केला. गवळी यांना 5 लाख 42 हजार 98 , तर ठाकरे यांना 4 लाख 24 हजार 159 मते मिळाली. वंचित बहुजन आघाडीचे प्रा. प्रवीण पवार 93228 मते घेऊन तिसऱ्या क्रमांकावर राहिले. भाजप बंडखोर पी. बी. आडे 24449 तर प्रहारच्या वैशाली येडे पाचव्या क्रमांकावर राहिल्या.
यवतमाळ-वाशिम लोकसभा मतदार संघात सात पैकी पाच आमदार भाजप, एक शिवसेना तर एक राष्ट्रवादी काँग्रेसचा आहे. लोकसभा मतदार संघातील पुसद विधानपरिषद क्षेत्रांमध्ये आजपर्यंत काँग्रेसला मताधिक्य राहिले आहे. मात्र यावेळी भावना गवळी यांना जवळपास सहा हजाराची आघाडी मिळाली आहे. वाशिम विधानसभा क्षेत्रात 24 हजार 57, कारंजा मतदार संघात 3 हजार 634, राळेगाव मतदार संघात 28 हजार 192, दिग्रस मतदार संघात 18 हजार 5 42 तर सर्वाधिक यवतमाळ विधानसभा क्षेत्रातून 37 हजार 277 मतांची आघडी मिळाली आहे.
या निवडणुकीमध्ये काँग्रेसचे उमेदवार माणिकराव ठाकरे यांना वंचित बहुजन आघाडीचे प्रवीण पवार, भाजपचे बंडखोर उमेदवार पी. बी. आडे, प्रहार जनशक्ती पक्षाच्या वैशाली येडे यांच्यामुळे मोठा धक्का बसला आहे.
दिग्रस विधानसभा मतदारसंघ माणिकराव ठाकरे यांच्या जुना मतदारसंघ असून यामध्येही माणिकराव ठाकरे माघारले आहेत. या मतदार संघात शिवसेनेचे महसूल राज्यमंत्री संजय राठोड यांची चांगली पकड असल्याने याठिकाणी शिवसेनेला मताधिक्य प्राप्त झाले. राळेगाव विधानसभेमध्ये खासदार भावना गवळी यांना 28 हजार 192 मतांची लीड मिळाली.