वर्धा- देवळी येथील एमआयडीसी परिसरात महालक्ष्मी कंपनीच्या गेटसमोर चिमुकल्यांनी आंदोलन केले. कंपनीतून निघणाऱ्या धुरामुळे होत असलेल्या प्रदूषणाने देवळीकरांच्या आरोग्याचा प्रश्न उद्भवला आहे. कंपनीतून सोडण्यात येणारा विषारी वायू चिमणीतून न सोडता तो प्लांट लेव्हलवर सोडली जात आहे. यामुळे देवळीकरांच्या आरोग्याच्या तक्रारी वाढत आहेत. यासाठीच चिमुकल्यांनी आंदोलन करत आम्हाला मोकळा श्वास पाहिजे, अशी मागणी लावून धरली.
देवळीच्या महालक्ष्मी स्टील कंपनीने पर्यावरणाचे नियम धाब्यावर बसवले असल्याचा आरोप केला जात आहे. नियमानुसार कंपनीतून निघणारा धूर हा चिमणीच्या सहाय्याने सायंकाळी उंचावर सोडला जाणे अपेक्षित आहे. पण, महालक्ष्मी कंपनीच्या वतीने तसे न करता बरेचदा भर दिवसा धूर प्लांट उंचीवर सोडला जातो, असा आरोप आहे. या धुरामुळे अनेकांना श्वसनाचे आजार होण्याची शक्यता आहे.