चंद्रपूरला जाणारा दारूसाठा जप्त; पोलिसांनी ठोकल्या तीन आरोपींना बेड्या

वर्धा आणि चंद्रपूर जिल्ह्यात दारुबंदी आहे. मात्र तरीही या दोन्ही जिल्ह्यात मोठ्या प्रमाणात दारुची तस्करी होत असल्याचे उघड झाले आहे. पोलिसांनी तस्करांच्या गाडीवर टाकलेल्या छाप्यात गाडीसह ८ लाखांचा ऐवज जप्त केला आहे.

वर्धा- चंद्रपूर जिल्ह्यात नेण्यात येणाऱ्या दारूसाठ्यावर पोलिसांनी छापा मारला. ही कारवाई समुद्रपूर पोलिसांनी केली. चंद्रकांत पवार, ब्रिजेश तामगाडगे आणि संदीप सिडाम या तीन तस्करांना पोलिसांनी बेड्या ठोकल्या. या कारवाईत पोलिसांनी कारसह 8 लाखाचा ऐवज जप्त केला आहे.

नागपूर - चंद्रपूर मार्गावरील जाम चौरस्त्यावर पोलिसांना एका कारमध्ये विदेशी दारूची वाहतूक होत असल्याची माहिती मिळाली होती. या आधारे सापळा लावून पोलिसांनी कारची तपासणी केली. यावेळी कारमध्ये विदेशी कंपनीची १ लाख २० हजाराची दारू आढळून आली. पोलिसांनी ही दारु जप्त करत तस्करांना बेड्या ठोकल्या आहेत.