सेवाग्राम रुग्णालयात प्लाझ्मा संग्रहण सुरू, कोविड रुग्णांच्या उपचारासाठी होणार मदत
कोरोनामुक्त झालेल्या रुग्णाच्या रक्तात प्रतिपिंडे (अँटीबॉडी) तयार होत असतात, ज्या कोरोना विषाणूंविरुद्ध लढण्यासाठी शरीराला मदत करतात. यामुळे कोरोना विषाणू संसर्गग्रस्त रुग्णांना बरे झालेल्या रुग्णाच्या रक्तातील प्लाझ्मा दिल्यामुळे त्यांची रोग प्रतिकारशक्ती सुधारण्यास मदत होते.
वर्धा - वर्ध्यातील सेवाग्रामच्या कस्तुरबा रुग्णालयात आणि महात्मा गांधी इन्स्टिट्यूट ऑफ मेडिकल सायन्सेसच्या वतीने कोविड रुग्णांसाठी प्लाझ्मा संकलन सुरू केले आहे. यामुळे कोविड रुग्णांच्या उपचारासाठी मोठी मदत होणार आहे. प्लाझ्मा थेरपी सुरू असणारा वर्धा हा विदर्भातून दुसरा जिल्हा असणार आहे. येत्या काळात याचा फायदा नक्कीच होणार आहे.
जिल्ह्यात कोरोनाबाधितांच्या मृत्यूंची संख्या 10 आहे. यासह उपचार घेऊन कोरोनामुक्त झालेल्या रुग्णाची संख्या 353 आहे. या कोरोनामुक्त झालेल्या रुग्णाच्या रक्तात प्रतिपिंडे (अँटीबॉडी) तयार होत असतात, ज्या कोरोना विषाणूंविरुद्ध लढण्यासाठी शरीराला मदत करतात. यामुळे कोरोना विषाणू संसर्गग्रस्त रुग्णांना बरे झालेल्या रुग्णाच्या रक्तातील प्लाझ्मा दिल्यामुळे त्यांची रोग प्रतिकारशक्ती सुधारण्यास मदत होते आणि रुग्ण आजारातून लवकर बरा होतो. या सुविधेमुळे कोरोना संसर्गित रुग्ण बरे होण्याचे प्रमाण वाढण्यास नक्कीच मदत होणार आहे.