कुंपणच खाते शेत! जिल्हा सामान्य रुग्णालयातील कर्मचाऱ्याकडून औषधांची विक्री, व्हिडिओने खळबळ

जिल्हा सामान्य रुग्णालयात सामान्य नागरिकांना मोफत औषध उपलब्ध करून दिले जाते. पण त्यांच्या हक्काचे औषध हा कर्मचारी पैसे घेऊन विकत होता. हा कर्मचारी कक्षसेवक म्हणून येथे कार्यरत आहे.

वर्धा- येथील जिल्हा सामान्य रुग्णालयातील कर्मचारी रुग्णांकरीता आलेली औषधे बाहेरील व्यक्तीला विकत असल्याचा एक व्हिडिओ व्हायरल झाला आहे. त्यानंतर जिल्हा शल्यचिकित्सक यांनी लगेच या कर्मचाऱ्याची बदली करत चौकशी सुरू केली. मात्र, या धक्कादायक प्रकाराने सामान्य नागरिकांसाठी असणारे औषध विकले जात असल्यामुळे चांगलीच खळबळ माजली आहे. विलास रघाताटे असे या कर्मचाऱ्याचे नाव आहे.

जिल्हा सामान्य रुग्णालयात सामान्य नागरिकांना मोफत औषध उपलब्ध करून दिले जाते. पण त्यांच्या हक्काचे औषध हा कर्मचारी पैसे घेऊन विकत होता. हा कर्मचारी कक्षसेवक म्हणून येथे कार्यरत आहे. हा व्हिडिओ व्हायरल झाल्यानंतर या कर्मचाऱ्यावर तत्काळ कारवाई करत त्याची कारंजा येथील ग्रामीण रुग्णालयात बदली करण्यात आली आहे. याबाबत चौकशी सुरू करण्यात आली आहे.

हायड्रोजन पॅराऑक्साइड हे औषध विकल्याचे या व्हिडिओत दिसत आहे. हे औषधाचा सलूनमध्ये डाय करण्यासाठी वापर होत असाव्. तसेच यामध्ये अल्कोहोलचे प्रमाण जास्त असल्याने पिकांवर फवारणीसाठी वापर होत असल्याचा व्हिडिओच्या संभाषणावरून वाटत आहे.

या घटनेने जिल्हा सामान्य रुग्णालयात सुरू असलेला भोंगळ कारभार चव्हाट्यावर आला. यामुळे अशा प्रकाराने इतरही औषधांची विक्री होत असल्याचा संशय आहे. यांसारख्या प्रकरणांना आळा बसावा, यासाठी औषधांची विक्री करणाऱ्यांवर कठोर कारवाईची गरज आहे.