ठाणे- मुलूंड पोलीस ठाण्याच्या हद्दीतील विजयनगर परिसरात ६९ किलो गांजासह दोन व्यक्तींना पोलिसांनी अटक केली. पोलिसांनी पकडलेल्या गांजाची अंदाजे किंमत ७ लाख इतकी आहे. दरम्यान, एतक्या मोठ्या प्रमाणात गांजा मुलूंड परिरसरात कसा आला याचा शोध पोलीस घेत आहेत.
ठाण्यामधून २७ जून रोजी गांजाची विक्री करण्यासाठी दोन व्यक्ती येणार असल्याची माहिती पोलिसांना मिळाली होती. तेव्हा पोलिसांनी सापळा रचून ही कारवाई केली. या कारवाईत पोलिसांनी रवींद्र विरंजन (वय २७) आणि मनोज बेनूदर ( वय २५) याला अटक केली आहे. दोघांनीही आपण या परिसरात गांजा विक्री करत असल्याची कबुली दिली आहे.
सुरुवातीला पोलिसांना अंगझडतीत १२ किलो ५०० ग्रॅम इतका गांजा आढळला. तेव्हा पोलिसांनी अधिक तपासणी केली असता, आरोपींनी एका ठिकाणी तब्बल ५६ किलो ५०० ग्रॅम गांजा लपवून ठेवला होता. तेव्हा पोलिसांनी हा गांजा जप्त केला. या प्रकरणी न्यायालयाने आरोपींना १ तारखेपर्यंत पोलीस कोठडी सुनावली आहे. या गुन्ह्याचा अधिक तपास पोलीस करत आहेत.