कल्याणमध्ये बालमजुरांच्या जीवाशी खेळ, लग्नात झगमगाट राहण्यासाठी हातात दिली विजेची छत्री

लग्नाच्या वरातीत ३ ते ४ तास ही छत्री घेऊन मुलांना चालावे लागते. मात्र, गरजेपोटी मुले ही कामे करतात. त्यांच्या गरजेचा फायदा घेऊन मंगल कार्यालयेही त्यांच्याकडून कुठलीही कामे करवून घेताना दिसतात.

कल्याण - लग्नाच्या मिरवणुकीत झगमगाट रहावा यासाठी विजेची छत्री बालमजुराच्या हातात देण्याचा प्रकार ठाण्यात समोर आला आहे. या मुलांच्या वयाच्या मानाने छत्रीचे वजन जास्त आहे. तसेच, विजेचा प्रवाह असल्याने ते धोकादायकही आहे. बालमजुरी करुन घेणे हा कायद्याने गुन्हा आहे. तरीही बालकांकडून मजूरी करुन घेण्याचे प्रकार सर्रास सुरू असल्याचे यानिमित्ताने दिसत आहे.

लग्नाच्या वरातीत ३ ते ४ तास ही छत्री घेऊन मुलांना चालावे लागते. मात्र, गरजेपोटी मुले ही कामे करतात. त्यांच्या गरजेचा फायदा घेऊन मंगल कार्यालयेही त्यांच्याकडून कुठलीही कामे करवून घेताना दिसतात. या बदल्यात त्यांना दिवसाला १५० ते २०० रुपये असा अतिशय तुटपुंजी मजुरी दिली जाते. कल्याणमधील लालचौकी ते बैलबाजार मार्गावर हा प्रकार सर्रास दिसून येत आहे. या रस्त्यावर ८ ते १० मंगल कार्यालये आहेत. ती बिनधोकपणे बालकामगारांकडून काम करवून घेतात.

बालमजुरी कमी झाली आहे, असे प्रशासनाकडून सांगण्यात येते. दरवर्षी जाहिरातींवर कोट्यवधी रुपये खर्चून बालमजुराकडून काम करुन घेणे गुन्हा आहे असे सांगितले जाते. बालमजुरी कमी होत आहे असेही सांगितले जाते. बालमजुरीतून सुटका ही केवळ बालमजूरविरोधी दिनापुरतीच मर्यादित असल्याचे दिसत आहे.

दुसरीकडे लग्नाच्या वरातीमुळे बहुतांश शहरातील रस्त्यांवर वाहतूक कोंडी होत असल्याने त्यावर उपाय म्हणून डिसेंबर २०१३ मध्ये ठाणे पोलीस आयुक्तालयाच्या परिसरातील तब्बल ५०० मंगल कार्यालयांना लग्न वरातीसाठी परवानगी घेण्यासाठी नोटीसा बजावल्या होत्या. सुरुवातीला काही मंगल कार्यालयांनी वाहतूक विभागाची परवानगी घेतल्याचे सांगण्यात आले. मात्र, लग्नात यजमानांची धावपळ होत असल्याने हळूहळू परवानग्या घेण्यासाठी अर्ज कमी झाले आहे.