पनवेल महापालिकात हद्दीत नव्याने १५ जणांना कोरोनाची लागण, एकूण कोरोनाबाधितांचा आकडा २३४ वर

आतापर्यंत पनवेल महानगरपालिका क्षेत्रात 234 कोरोनाबाधित रुग्ण आढळले आहेत. या रुग्णांपैकी 100 रुग्ण कोरोनामुक्त होऊन घरी परतले आहेत. शुक्रवारीही कामोठेमधील 2 व नवीन पनवेलमधील 2 रुग्णांची कोरोनाची अंतिम चाचणी निगेटिव्ह आल्याने घरी सोडण्यात आले आहे. आतापर्यंत सात जणांचा मृत्यू झाला आहे. सध्या पनवेल महापालिका हद्दीत कोरोनाच्या 127 जणांवर कोरोनाचे उपचार सुरू आहेत.

नवी मुंबई - पनवेल महापालिका क्षेत्रात शुक्रवारी (15 मे) 15 नवे कोरोनाबाधित रुग्ण आढळून आले आहेत. महापालिका क्षेत्रात आढळलेल्या रुग्णांमध्ये कामोठ्यातील 8, खारघरमधील 3, कळंबोलीतील 3, खांदा कॉलनी मधील 1 व तक्का येथील 1, असे मिळून 15 रुग्णांचा समावेश आहे. आतापर्यंत पनवेल महानगरपालिका क्षेत्रात 234 कोरोनाबाधित रुग्ण आढळले आहेत. या रुग्णांपैकी 100 रुग्ण कोरोनामुक्त होऊन घरी परतले आहेत. शुक्रवारीही कामोठेमधील 2 व नवीन पनवेलमधील 2 रुग्णांची कोरोनाची अंतिम चाचणी निगेटिव्ह आल्याने घरी सोडण्यात आले आहे. आतापर्यंत सात जणांचा मृत्यू झाला आहे. सध्या पनवेल महापालिका हद्दीत कोरोनाच्या 127 जणांवर कोरोनाचे उपचार सुरू आहेत.

कामोठ्यात कोरोनाचा ८ नवे रुग्ण -

कामोठ्यातील सेक्टर 35 मधील 2 व्यक्तींना कोरोनाची लागण झाली आहे. या व्यक्तींच्या कुटुंबातील एक महिला मुंबई महापालिकेत लिपिक म्हणून कार्यरत असून याआधीच कोरोना पॉझिटिव्ह आली होती. या महिलेपासून या दोघांना संसर्ग झाल्याचे स्पष्ट झाले आहे. तसेच कामोठे, सेक्टर-10 मधील 54 वर्षीय व्यक्ती कोरोना पॉझिटिव्ह आढळून आली असून, ही व्यक्ती मुंबई महापालिकेच्या घाटकोपर येथील कार्यालयात सुरक्षा रक्षक म्हणून कार्यरत आहे.

सेक्टर-22 मधील, 31 वर्षीय महिलेला कोरोनाची लागण झाली आहे. ही महिला नवीन पनवेल येथील रुग्णालयामध्ये उपचार करण्यासाठी वारंवार जात होती. त्यामुळे तिला रुग्णालयात संसर्ग झाल्याचे सांगितले जात आहे. तसेच सेक्टर-11 मधील 57 वर्षीय व्यक्तीला कोरोनाची लागण झाली आहे. ही व्यक्ती मुंबईत बेस्ट डेपोमध्ये कॅशियर म्हणून कार्यरत आहे. कामोठे येथील एका रुग्णालयात 24 वर्षीय व्यक्ती आलेली आहे. या व्यक्तीला त्या रुग्णालयामधून संसर्ग झाल्याची प्राथमिक माहिती आहे. तसेच कामोठे, सेक्टर-16 मधील 56 वर्षीय महिलेला कोरोनाची लागण झाली आहे. ही महिला बँक ऑफ इंडियाच्या माजगाव शाखेत लिपिक पदावर कार्यरत असून या महिलेला कामाच्या ठिकाणीच संसर्ग झाला आहे. याशिवाय कामोठे, सेक्टर-8 मधील 36 वर्षीय महिलेला कोरोनाची लागण झाली आहे. ही महिला गोवंडीतील शताब्दी रुग्णालयामध्ये एक्सरे टेक्निशीयन म्हणून कार्यरत आहे.

खारघरमध्ये 3 नवे कोरोनाबाधित रुग्ण -

स्मित सोसायटीमधील सेक्टर २५ एच येथील 34 वर्षीय व्यक्तीला कोरोनाची लागण झाली आहे. मुंबई विमानतळावर सीआयएसएफ सुरक्षा रक्षक म्हणून कार्यरत असलेल्या या जवानाला कामाच्या ठिकाणीच संसर्ग झाल्याचा अंदाज आहे. तसेच सेक्टर-15 मधील 15 वर्षीय मुलीला कोरोनाची लागण झाली आहे. या मुलीचे वडील मुंबईतील शिवाजीनगर येथे पोलीस कर्मचारी म्हणून कार्यरत असून ते याआधीच कोरोना पॉझिटिव्ह आलेले आहेत. त्यांच्यापासूनच या मुलीला संसर्ग झाला आहे. याशिवाय सेक्टर-5 मधील सावनी सोसायटी येथील 31 वर्षीय महिलेला कोरोनाची लागण झाली आहे. या महिलेचे पती मुंबईतील माहिम बेस्ट डेपोमध्ये कार्यरत असून त्यांच्यापासूनच या महिलेला संसर्ग झाला आहे.

कळंबोलीतही कोरोनाचे २ नवे रुग्ण -

सेक्टर 11 मधील 45 वर्षीय महिलेला कोरोनाची लागण झाली आहे. या महिलेचे पती मुंबईत वांद्रे बस डेपोमध्ये बस कंडक्टर म्हणून कार्यरत असून ते याआधीच कोरोना पॉझिटिव्ह म्हणून आढळून आले होते. त्यांच्यापासून या महिलेला संसर्ग झाला आहे. याशिवाय सेक्टर 14 मधील, 36 वर्षीय व्यक्तीला कोरोनाची लागण आहे. मुंबईत धारावी राहणारी ही व्यक्ती गेल्या काही दिवसांपूर्वी कळंबोलीतील नातेवाईकांकडे राहण्यास आली असून, या व्यक्तीला धारावी येथे संसर्ग झाला असल्याचे प्राथमिक तपासात आढळून आले आहे.

खांदा कॉलनी आणि तक्का येथे कोरोनाचा प्रत्येकी एक रुग्ण -

खांदा कॉलनीतील सेक्टर-6 मधील निळकंठ पार्क सोसायटीतील 54 वर्षीय व्यक्ती कोरोना पॉझिटिव्ह आली आहे. ही व्यक्ती मर्चंट नेव्ही, मुंबई येथे कार्यरत आहे. तसेच तक्का येथील मोराज रिव्हरसाईड पार्क येथील 33 वर्षीय महिलेला कोरोनाची लागण झाली आहे. पनवेल तालुका पोलीस ठाण्यामध्ये पोलीस कर्मचारी म्हणून कार्यरत असलेल्या या महिलेला कामावर असतानाच संसर्ग झाला असावा, असा प्राथमिक अंदाज आहे.