सोलापूर -कोरोनाचा प्रादुर्भाव रोखण्यासाठी राज्यासह देशभरातील मंदिरे दर्शनासाठी बंद झाली. त्याच प्रमाणे राज्याचे आराध्य दैवत असलेले पंढरपूरच्या विठ्ठलाचेही मंदिरही वारकऱ्यांसाठी बंद राहिले. मात्र, चैत्रीपाठोपाठ आषाढी वारीच्या काळातही पंढरपूरचं मंदिर दर्शनासाठी बंद असतानाही गरिबांचा देव विठोबा लखपती झाला आहे. आषाढी वारी काळात विठ्ठल-रुक्मिणी मंदिर समितीच्या दान पेटीत चक्क 16 लाख 15 हजार 860 रुपयांची देणगी जमा झाली आहे.
देशात कोरोना विषाणूचा कहर सुरू झाला आणि जनजीवन ठप्प झाले. परिणामी नागरिकांच्या सुरक्षेसाठी का असेना मात्र, कोरोनामुळे मंदिराची दारे बंद झाली. मंदिर बंद ठेवण्याचे आदेशच प्रशासनाने काढले होते. त्यानुसार 17 मार्चपासून पंढरपूरच्या विठ्ठल रुक्मीणीचे मंदिरही दर्शनासाठी बंद ठेवण्यात आले. देशात लॉकडाऊन सुरू झाला. त्याच काळात पंढरपूरची चैत्री एकादशी आली या काळातही मंदिर बंद ठेवण्यात आले. त्या पाठोपाठ आषाढी एकादशीची यात्राही बंद राहिली. पहिल्यांदाचा चंद्रभागेचा तिरावर वारकऱ्यांची मांदियाळी पाहयाला मिळाली नाही. प्रतिवर्षी पंढरपूरच्या आषाढीवारीला जवळपास ८ ते १० लाख भाविक हजेरी लावतात. प्रत्येक वारकरी आपआपल्या ऐपतीनुसार पांडुरंगाच्या चरणी दान अर्पण करतो. मात्र, यंदा वारकऱ्यांना घरातूनच वारी करावी लागली. तरीही 22 जून ते 2 जुलै अशा 10 दिवसात श्रीविठ्ठलाच्या चरणांवर जवळपास 16 लाख 16 हजारांची देणगी जमा झाली आहे.
अशी आली देणगी....
पांडुरंगाच्या दानपेटी जमा झालेल्या देणगीमध्ये ऑनलाईनद्वारे अन्नछत्रासाठी 66 हजार, महानैवेद्य 30 हजार, आणि देणगी रुपाने 3 लाख 42 हजार 712 रुपये. तर इतर माध्यमातून 11 हजार 77 हजार 148 रुपयांची रकमेचा समावेश आहे. गेल्यावर्षी आषाढीवारीला 4 कोटी 41 लाख देणगी मिळाली होती. त्या तुलनेत यंदाची रक्कम कमी असेल पण मंदिर बंद असतानाही हे दान मिळाल्यामुळं मंदिर समिती प्रशासनानं समाधान व्यक्त केले आहे.
