सोलापूर- मुंबईहून ओरीसा येथे डांबराचे पिंप घेऊन निघालेला ट्रक वडवळ रेल्वेपूलानजिक असलेली साईडपट्टी तोडून खालच्या रेल्वे लाईनवर कोसळल्याने अपघात झाला. या अपघातात रेल्वेरुळासह गाडीचे सुमारे १७ लाखांचे नुकसान झाले. या घटनेची अगोदरच रेल्वे प्रशाशनाला माहिती मिळाल्याने सर्व गाड्या थांबविण्यात आल्या, अन्यथा मोठा अनर्थ घडला असता.
मुंबईहून डांबराचे पिंप घेऊन ओरीसाकडे निघालेला ट्रक (के .ए .५६ / ३६४९) हा वडवळजवळ आला असता, ड्रायव्हरचा तोल गेल्याने तो ट्रक पुलानजिकच्या साईट पट्टीवरुन वीस फुट खाली कोसळला. ट्रक रेल्वेच्या मुख्य लाईनवर जावून पडला. या ट्रकमध्ये रस्त्याच्या कामासाठी वापरले जाणारे डांबराचे ड्रम होते. यात हायवेचे ९० हजार, रेल्वेचे १ लाख तर डांबर आणि ट्रक, असे एकून १७ लाखांचे नुकसान झाले.
घटना घडताच रेल्वे रुळावर काम करणारे कामगार पटूशा वगरे आणि विपूल सलगर यांनी तातडीने मोहोळच्या रेल्वे प्रशासनास सुचना दिल्या. त्यामुळे या मार्गावरील सर्व गाड्या थांबविण्यात आल्या. घटनेची माहिती मिळताच रेल्वे प्रशासनाचे सर्व वरिष्ठ अधिकारी घटनास्थळी हजर झाले. दरम्यान, रेल्वे प्रशासनाची आपातकालीन रेल्वे व्हॅन घटनास्थळी हजर होती. ८.४५ ते १२.२० अशा अडीच तासात रुळ पुर्ववत करण्यात आला. या बाबत मोहोळ पोलीस ठाण्यात ट्रक चालक नवनाथ मारुती पूरी यांच्यावर रेल्वे प्रशासनाच्या गाड्या येण्या-जाण्यास अडथळा केला म्हणून रेल्वे अधिनियम १७४ नुसार व भादवी २७९ , ४२७ नुसार पोलीस प्रशाशनाच्यावतीने गुन्हा दाखल करण्यात आला. याबाबत अधिक तपास सहाय्यक फौजदार नागराज निंबाळे करत आहेत.