सोलापूर- शहराला पिण्यासाठी सोडावे लागणाऱ्या पाण्यामुळे उजनी धरणातील पाण्याचे नियोजन कोलमडल्याची प्रतिक्रिया राज्याचे जलसंपदा राज्यमंत्री विजय शिवतारे यांनी दिली. आदित्य ठाकरे यांच्या उपस्थितीत मोहोळ तालुक्यातील आष्टी उपसा सिंचन योजनेच्या उद्घाटनासाठी शिवतारे सोलापुरात आले होते. त्यावेळी त्यांनी राज्यातील धरण आणि पाणी परिस्थितीवर भाष्य केले.
राज्यात सर्वाधिक साठवण क्षमता असलेल्या उजनी धरणात यावर्षी ११० टक्के पाणी आले होते. मात्र, या पाण्याच्या नेटक्या नियोजनाअभावी सोलापूर जिल्ह्याला तीव्र पाणीटंचाईचा सामना करावा लागला. त्यामुळे पिण्याच्या तसेच शेतीच्या पाण्याचा तुटवडा निर्माण झाला. शेती पिके नष्ट झाली. शिवाय माढा तालुक्यात गळती दुरुस्तीच्या नावाखाली पाणी पाठविण्यात येत आहे. या गोष्टीकडे लक्ष वेधले असता शिवतारे यांनी सोलापूरला द्याव्या लागणाऱ्या पाण्यामुळे उजनी धरणातले पाणी वाया जात असल्याची प्रतिक्रिया दिली.
सध्याच्या सरकारकडून यंदा मुंबईत बसून उजनीतल्या पाण्याचे नियोजन केले गेले. शिवाय जलसंपदा विभागातील अनियमिततेमुळे ११० टक्के भरलेले धरण रिकामे झाले. याची संपूर्ण सोलापूर जिल्ह्यात चर्चा आहे. पण त्याचे ठोस उत्तर देणे आतापर्यंत तरी सरकारला जमलेले नाही. म्हणून येणाऱ्या पावसाळ्यानंतर तरी योग्य नियोजन व्हावे, अशी अपेक्षा सोलापूर जिल्हावासीय करत आहेत.