सोलापूर- जिल्ह्यातील उजनी प्रकल्पासाठी राज्य शासनाने २ हजार ६२२ कोटी रुपयांच्या सुधारीत प्रशासकीय मान्यतेस मंजूरी दिली आहे. उजनी प्रकल्पांतर्गत येणाऱ्या कामांसाठी ही मान्यता देण्यात आलेली आहे. ८ मार्चला राज्याच्या जलसंपदा विभागाने ही मंजूरी दिली आहे. या सुधारीत प्रशासकीय मान्यतेमुळे उजनी प्रकल्पामध्ये अपूर्ण राहिलेली कामे पूर्णत्वास नेण्यास मदत होणार आहे.
सोलापूर, पूणे आणि नगर या तीन जिल्ह्यातील १३ तालूक्यातील शेतजमीनीच्या सिंचनासाठी भीमा नदीवर उजनी धरण बांधण्यात आलेले आहे. १९६४ मध्ये उजनी धरणाला मान्यात देण्यात आली होती. त्यावेळी एकूण ४० कोटी ५१ लाख रुपये एवढा खर्च धरणासाठी अपेक्षित होता. मात्र, यात वाढ होत गेली आणि १९७६ पर्यंत हा प्रकल्प ११३ कोटी रुपयांपर्यंत गेला. १९७६ नंतर साल २००० पर्यंत या प्रकल्पाचा खर्च वाढत जाऊन १ हजार ४०५ कोटी रुपयांच्या खर्चास दूसऱ्यांदा प्रशासकीय मान्यता देण्यात आली.