चिखलफेक प्रकरण; नितेश राणेंसह १८ आरोपींना दुपारी कणकवली कोर्टात हजर करणार !

अभियंत्याला मारहाण प्रकरणी आमदार नितेश राणेंसह १८ जणांना आज कणकवली न्यायालयात हजर करण्यात येणार आहे. नितेश राणे यांनी गुरुवारी एका अभियंत्याच्या अंगावर चिखलफेक करुन धक्काबुक्की केली होती.

कणकवली- अभियंत्याला मारहाण प्रकरणी आमदार नितेश राणेंसह १८ जणांना आज कणकवली न्यायालयात हजर करण्यात येणार आहे. त्यामुळे पोलिसांनी शहरात तसेच न्यायालय परिसरात चोख पोलीस बंदोबस्त ठेवला आहे. स्वतः पोलीस अधीक्षक दीक्षित गेडाम आणि अप्पर पोलीस अधीक्षक निमित्त गोयल कणकवलीत दाखल झाले आहेत.

अभियंत्याला मारहाण प्रकरणी आमदार नितेश राणे आणि त्यांच्या इतर साथीदारांना कणकवली पोलिसांनी गुरुवारी रात्री अटक केली. पोलिसांनी अटक केलेल्या सर्व आरोपींची नियमानुसार वैद्यकीय तपासणी करण्यात आली. या तपासणी दरम्यान आमदार नितेश राणे आणि अन्य दोन कार्यकर्त्यांना डॉक्टरांनी रुग्णालयातच ठेवण्याचा सल्ला दिला. त्यामुळे नितेश राणेंनी रात्र कणकवली उपजिल्हा रूग्णालयात काढली.नितेश राणे सध्या उपजिल्हा रुग्णालयात उपचार घेत असल्याने कार्यकर्त्यांची रुग्णालयाबाहेर मोठी गर्दी जमली आहे. त्यामुळे कोणतीही अनुचित घटना घडू नये याची दखल पोलिसांकडून घेतली जात आहे.