...तर ॲक्शनला रिॲक्शन होणारच - उदय सामंत

मुख्यमंत्र्यांवर टीका करण्यासाठीच ही यात्रा काढली जात असल्याचा अनुभव येत असल्याचे त्यांनी सांगितले. अलीकडे झालेल्या सर्वेक्षणात मुख्यमंत्री उद्धवजी ठाकरे देशात लोकप्रिय मुख्यमंत्री असल्याचे समोर आले आहे, असेही यावेळी सामंत म्हणाले.

सिंधुदुर्ग - ॲक्शन चांगली असेल तर रिॲक्शन चांगली असणार पण ॲक्शनच वाईट असेल तर रिॲक्शनही वाईट होणार, असे सूचक वक्तव्य पालकमंत्री उदय सामंत यांनी राणे यांच्या जन आशीर्वाद यात्रे संदर्भात केले आहे. तसेच जिल्ह्यात मनाई आदेश लागू असल्याने या मनाई आदेशाचे उल्लंघन झाल्यास कोणती कारवाई करायची हे जिल्हाधिकारी ठरवतील, असेही त्यांनी सांगितले. ते माध्यमांशी बोलत होते.

'जन आशीर्वाद यात्रेला आमचा विरोध नाही'

जन आशीर्वाद यात्रेला आमचा विरोध नाही. पक्ष वाढविण्याचा सर्वांना अधिकार आहे. परंतु देशात गॅस, पेट्रोल, डिझेल व इतर सर्वच वस्तू महागल्या आहेत. ही महागाई कधी कमी करणार, जिल्ह्यात रोजगार निर्मितीसाठी काय करणार याबाबत जनआशीर्वाद यात्रेत बोलले पाहिजे. मात्र शिवसेनेवर, मुख्यमंत्र्यांवर टीका करण्यासाठीच ही यात्रा काढली जात असल्याचा अनुभव येत असल्याचे त्यांनी सांगितले. अलीकडे झालेल्या सर्वेक्षणात मुख्यमंत्री उद्धवजी ठाकरे देशात लोकप्रिय मुख्यमंत्री असल्याचे समोर आले आहे, असेही यावेळी सामंत म्हणाले.

'उद्धव ठाकरे हे शिवसैनिकांचे दैवत'

संपूर्ण देशात मुख्यमंत्री उद्धव ठाकरे यांना मानणारा वर्ग आहे. भविष्यात ते देशाचं नेतृत्व करू शकतात. यामुळे काहींना पोटशूळ आला आहे. त्यातूनच मुख्यमंत्री उद्धव ठाकरे यांच्यावर टीका होत आहे, असे उदय सामंत यांनी सांगितले. उद्धव ठाकरे हे शिवसैनिकांचे दैवत आहे. त्यांच्यावर टीका झाली तर शिवसैनिक गप्प बसणार नाहीत. कोकणात शिवसेना फोफावलेली आहे. कोकण हा कायमच सेनेचा बालेकिल्ला राहणार आहे, असेही ते म्हणाले.

'ठाकरे - फडणवीस यांच्यात चर्चेबाबत माहित नाही'

उद्धव ठाकरे आणि देवेंद्र फडणवीस यांच्यात चर्चा झाली आहे का? याबाबत आपल्याला माहित नाही. मात्र ओबीसी आरक्षणाच्या निमित्ताने चर्चा झाली असावी किंवा जनशीर्वाद यात्रेच्या निमित्ताने चर्चा झाली असेल, तर ते काही आम्हाला सांगणार नाहीत. चर्चाच झाली असेल तर ती चांगलीच आहे, असेही उदय सामंत म्हणाले.

हेही वाचा -पोलीस आणि गावगुंडांच्या जोरावर हे सरकार चालतंय - चंद्रकांत पाटील