सातारा -सरकार कुणाचे बनेल हे सांगता येत नाही, असे सूचक वक्तव्य माजी मुख्यमंत्री आणि कराड दक्षिणमधून विजयी झालेले आमदार पृथ्वीराज चव्हाण यांनी केले आहे. कराड येथील विजयी सभेत ते बोलत होते. तसेच पवार साहेबांच्या नेतृत्वाखाली दोन्ही पक्षांनी एकदिलाने निवडणूक लढल्याचेही ते म्हणाले.
निकाल घोषित होऊन चव्हाण यांच्या विजयावर शिक्कामोर्तब झाल्यानंतर त्यांच्या समर्थकांनी गुरूवारी रात्री कराड येथे विजयी सभा घेतली. सभेत बोलताना चव्हाण म्हणाले, आधी जनतेची सेवा करून मगच त्यांचा आशिर्वाद मागायला आले पाहिजे. मागील निवडणुकीपेक्षा जास्त जागा मिळाल्या असल्या तरी अजुन लढाई संपलेली नाही. ही विचारांची लढाई आहे. उद्या कुणाचेही सरकार झाले तरी आपल्या पक्षाची आणि पक्षाच्या विचारांची ताकद आपण वाढविली पाहिजे.