सातारा - गेल्या काही दिवसांपासून राज्यात सर्वत्र दमदार पावसाने हजेरी लावली आहे. त्यामुळे साताऱ्या जिल्ह्यात झालेल्या मुसळधार पावसाने तेथील वेण्णा तलाव शुक्रवारी रात्री पूर्ण भरला. हा वेण्णा तलाव महाबळेश्वर-पाचगणीची लाईफलाईन मानला जातो. शुक्रवारी मध्यरात्रीपासूनच या वेण्णा तलावाच्या सांडव्यावरुन पाणी वाहू लागले आहे.
मुसळधार पावसाने साताऱ्यातील वेण्णा-तलाव भरला.
उशिरा आलेल्या मान्सूनमुळे महाबळेश्‍वरात पावसाला उशिरा सुरुवात झाली. एप्रिल अखेर या वेण्णा तलावातील पाण्याने तळ गाठला होता. कोकण, पश्‍चिम महाराष्ट्र व दक्षिण भारताला महाबळेश्‍वरमध्ये पडत असलेल्या पावसाचा उपयोग होतो. मात्र, ऐन उन्हाळ्यात वेण्णा तलावातील पाण्याने तळ गाठल्याने पिण्याच्या पाण्यासह पर्यटनावरही याचा विपरीत परिणाम झाला होता. त्यामुळे एकूणच महाबळेश्‍वरसह पाचगणी नगरपालिका प्रशासन चिंतेत होते.