'रामदास स्वामी छत्रपती शिवाजी महाराजांचे गुरू नव्हते'

जाणता राजा म्हणा, असे मी कुणाला म्हटलेले नाही. शिवाजी महाराजांचा इतिहास प्रामाणिकपणे वाचला, तर शिवाजी महाराजांना लोकांनी छत्रपती ही उपाधी दिली होती, जाणता राजा ही नव्हती, हे लक्षात येईल, असे शरद पवार म्हणाले.

सातारा- रामदास स्वामी यांनी जाणता राजा हा शब्द जन्माला घातला होता. रामदास स्वामी हे शिवरायांचे गुरू नव्हते, शिवरायांच्या गुरू या माँसाहेब जिजामाता होत्या, असे वक्तव्य राष्ट्रवादीचे अध्यक्ष शरद पवार यांनी केले आहे. ते साताऱ्यातील एका कार्यक्रमात बोलत होते.

जाणता राजा फक्त आणि फक्त शिवाजी महाराजचं आहेत, असे म्हणत शिवाजी महाराजांचे वशंज आणि भाजपचे नेते उदयनराजे भोसले यांनी राष्ट्रवादीचे अध्यक्ष शरद पवार यांच्यावर नाव न घेता टीका केली होती. त्यांच्या या विधानावर राष्ट्रवादीचे नेते आणि मंत्री जितेंद्र आव्हाड यांनी सडेतोड उत्तर दिल्यानंतर साताऱ्यातील कार्यक्रमात शरद पवारांनी यांनीही यावर भाष्य केले आहे. शिवाजी महाराजांचा इतिहास नीट वाचा. लोकांनी त्यांना जाणता राजा नव्हे, तर छत्रपती ही उपाधी दिली होती, असे शरद पवार यांनी म्हटले आहे.

शरद पवार म्हणाले की, जाणता राजा म्हणा असे मी कुणाला म्हटलेले नाही. शिवाजी महाराजांचा इतिहास प्रामाणिकपणे वाचला तर शिवाजी महाराजांना लोकांनी छत्रपती ही उपाधी दिली होती, जाणता राजा ही नव्हती, हे लक्षात येईल. जाणता राजा हा शब्दप्रयोग रामदास स्वामींनी जन्माला घातला. जे लोक रामदास शिवाजी महाराजांचे गुरू होते, असे सांगतात ते खोटा इतिहास लादण्याचा प्रयत्न करतात, असा आरोपही पवारांनी केला.

रामदास स्वामी शिवाजी महाराजांचे गुरू नव्हते, असे विधानही पवार यांनी केले. शिवाजी महाराजांच्या गुरू या राजमाता जिजाऊ होत्या, असेही पवारांनी सांगितले.