सातारा - जिल्ह्यातील काळोशी गावाचे जवान सूरज लक्ष्मण लामजे (वय २८) यांना लडाख भागात झालेल्या एका अपघातात वीरमरण आले. त्यांच्या पार्थिवावर आज सायंकाळी काळोशी येथे अंत्यसंस्कार करण्यात येणार आहेत. काळोशीचे उपसरपंच समीर डफळ यांनी यासंबंधी माहिती दिली.
मिळालेल्या माहितीनुसार, सूरज लक्ष्मण लामजे हे लेह भागात कर्तव्यावर होते. ते मालवाहू वाहनातून साहित्य घेऊन जात असताना शुक्रवारी त्यांचा अपघात झाला. या अपघातात त्यांना वीरमरण आले.
सूरज लक्ष्मण लामजे हे २०१४मध्ये भारतीय सैन्यात भरती झाले होते. लष्कराच्या वाहतूक विभागात ते चालक म्हणून कार्यरत होते. त्यांच्या पश्चात आई-वडील, पत्नी, मुलगा, बहिण, भाऊ असा परिवार आहे.