सांगली -थकित वेतनासह विविध मागण्यांसाठी महांकाली साखर कारखान्याच्या विरोधात कारखान्याच्या कामगारांनी बेमुदत उपोषण सुरू केले आहे. कवठेमहंकाळ तहसील कार्यालयासमोर शेकडो कामगारांनी हे आंदोलन सुरू केले आहे.
सांगलीच्या कवठेमहांकाळ येथील महांकाली साखर कारखान्याच्या शेकडो कामगारांचे वेतन एक वर्षांपासून थकीत आहे. प्रॉव्हिडंट फंड कामगारांच्या खात्यावर जमा करण्यात आलेला नाही. त्यामुळे गेल्या काही महिन्यांपासून महांकाली प्रशासन आणि कामगारांच्या दरम्यान संघर्ष सुरू आहे. दोन महिन्यांपूर्वी कारखान्याविरोधात कामगारांनी मोर्चे काढून आंदोलने सुद्धा केली. त्यावर कारखाना प्रशासनाकडून थकीत देणी प्रॉव्हिडंट फंडची रक्कम जमा करण्याचे आश्वासन देण्यात आले होते. मात्र, प्रत्यक्षात देणी देण्यास कारखाना प्रशासनाकडून गेल्या दोन महिन्यांपासून टाळाटाळ करण्यात येत आहे. त्यामुळे संतप्त झालेल्या कामगारांनी कारखान्याच्या विरोधात पुन्हा आंदोलन सुरू केले आहे.
राज्य सरकारने कारखान्यावर कारवाई करत कामगारांची थकीत देणे देण्याबाबत कवठेमंकाळ तहसील कार्यालयासमोर आंदोलन सुरू केले. गुरुवारपासून कामगारांनी त्याठिकाणी बेमुदत उपोषण सुरू केले. यामध्ये शेकडो कामगारांनी सहभाग घेतला आहे. कारखाना प्रशासनाकडून सुमारे 20 ते 25 कोटी रुपयांची देणी कामगारांची थकीत आहेत. गेल्या एक वर्षांपासून वेतन नसल्याने कामगारांवर उपासमारीची वेळ आली आहे. त्यामुळे जोपर्यंत कारखान्याकडून कामगारांचे थकीत वेतन, प्रॉव्हिडंट फंडाची रक्कम मिळत नाही, तोपर्यंत हे उपोषण चालूच ठेवण्याचा इशारा कामगारांनी तहसील प्रशासनाला निवेदनाद्वारे दिला आहे.