सांगलीत दोन वेगवेगळ्या अपघातात ४ जण जखमी

सांगली-इस्लामपूर रोडवरील तुंग जवळ दुभाजकाला धडकून आज दोन अपघात झाले आहेत.

सांगली - इस्लामपूर मार्गावरील तुंग जवळ आज २ अपघात घडले. या वेगवेगळ्या घटनेत एक कंटेनर आणि एक स्विफ्ट गाडी तुंगजवळच्या रस्त्याच्या दुभाजकाला धडकल्या. या घटनेत ४ जण जखमी झाले आहेत.

जिल्ह्यात आज सकाळी दोन वेगवेगळ्या ठिकाणी दोन वाहनांचे अपघात झाले. पहिल्या अपघातात जयसिंगपूर येथून पुण्याला निघालेला कंटेनर तुंग जवळ आल्यानंतर पुढील चाकाचा रॉड तुटल्याने दुभाजकाला धडकून उलटला. या अपघातात चालक किरकोळ जखमी झाला. तर दुसरा अपघात आष्ट्याहून-सांगलीला निघालेली स्विफ्ट गाडीचा झाला. पहाटे ५ च्या सुमारास तुंग मिणच्या मळ्याजवळ गाडीच्या चालकाचा ताबा सुटल्याने गाडी दुभाजकाला धडकून पलटी झाली. यामध्ये तीन जण किरकोळ जखमी झाले आहेत.