रत्नागिरी- वायू चक्रीवादळ महाराष्ट्राच्या किनारपट्टीपासून पुढे सरकले आहे. मात्र, या वादळाचे परिणाम आता किनारपट्टी भागात दिसू लागले आहेत. अरबी समुद्रातील कमी दाबाच्या पट्याने समुद्र प्रचंड खवळला आहे. किनाऱ्याला सध्या साडेचार मीटरपर्यंतच्या लाटा उसळताना पहायला मिळत आहेत.
रत्नागिरीतील भगवती जेट्टीवरूनही समुद्राच्या लाटा पाहायला मिळत आहेत. भगवती जेट्टीप्रमाणेच जिल्ह्याच्या इतर किनारपट्टी भागातही अशीच स्थिती आहे. तसेच कोकण किनारपट्टी भागात वाऱ्याचा वेगही वाढलेला पाहायला मिळत आहे. वाऱ्याच्या वेगामुळे कोकण किनारपट्टी भागात उसळणाऱ्या लाटांचे पाणी भरती बरोबर मानवी वस्तीत घुसत असल्याच्या घटना देखील काही ठिकाणी घडल्या आहेत. त्यामुळे नागरिकांमध्ये भीतीचे वातावरण निर्माण झाले आहे.
या पार्श्वभूमीवर पर्यटकांना देखील समुद्रावर जाण्यास प्रशासनाने बंदी घातली आहे. मासेमारीसाठी कोणीही समुद्रात जाऊ नसे, असे आवाहन जिल्हा प्रशासनाने केले आहे. तसेच किनारपट्टी भागात जिल्हा प्रशासनाने सतर्कतेचा इशारा दिला आहे.
