रत्नागिरी - जामनगर एक्सप्रेसमध्ये एक कंत्राटी कामगार रेल्वेतील बेसिनच्या नळाचे पाणी सीलबंद पाणी म्हणून विकत असल्याचा धक्कादायक प्रकार समोर आला आहे. एका प्रवाशाच्या सतर्कतेमुळे हा प्रकार उघडकीला आला. रत्नागिरी रेल्वे स्थानकावर या कामगाराची प्रवाशांनी टीसीकडे तक्रार केली. त्यानंतर रेल्वे पोलिसांनी रवींद्र व्यास या कंत्राटी कामगाराला ताब्यात घेतले.
जामनगर एक्सप्रेसमधून प्रवास करणाऱ्या प्रवाशाने गाडीतील रवींद्र व्यास या विक्रेत्याला पाण्याची बाटली मागितली. त्याने पाण्याची बाटली आणून दिली. मात्र, त्याने दिलेले पाणी हे सीलबंद बाटलीतील नसून रेल्वेच्या बेसिनमधून भरले असल्याचे प्रवाशाच्या लक्षात आले. रत्नागिरी स्थानकावर गाडी आल्यानंतर या प्रवाशाने रवींद्र व्यासची तक्रार रेल्वेच्या अधिकाऱ्यांकडे केली.
हेही वाचा - माघी यात्रेनिमित्त विठ्ठलाची शासकीय महापूजा
रवींद्र व्यासच्या विरोधात टीसीने तक्रार दाखल केली. त्यानंतर रेल्वे सुरक्षा बलाने (आरपीएफ) त्याच्यावर कारवाई करत त्याला चौकशीसाठी ताब्यात घेतले. रवींद्र व्यास हा कंत्राटी कामगार खानपान सेवा देणाऱ्या ठेकेदाराचा अधिकृत विक्रेता होता का? याबाबत पोलीस तपास करत आहेत. मात्र, या प्रकारामुळे रेल्वेत मिळणारे सीलबंद बाटलीतील पाणी आणि खाद्यपदार्थ सुरक्षित आहे का? याबाबत प्रश्न निर्माण झाला आहे.
