रायगड - घराचा आधार असलेले वडिलांचे छत्र हरवल्यानंतर विधवा आई, मोठी बहीण, यांचा भार आपल्या खांद्यावर घेऊन तिने घर सावरले. अल्प शिक्षणामुळे धुणी भांडी, घरकाम असे पडेल ते काम तिने केले. गॅस सिलिंडर पोहोचविण्याचे काम करणाऱ्या पुरुषाच्या खांद्याला खांदा लावून तिने गॅस सिलिंडर घरोघरी पोहोचविण्याचे अवघड काम करून स्वतःसह आई व बहिणीचा उदरनिर्वाह चालवून स्वतःच्या पायावर उभी राहिली.
ही कहाणी आहे, रायगड जिल्ह्यातील नेरळ येथे राहणाऱ्या कल्पना पांडुरंग हिलाल यांची. 12 वर्षांची असल्यापासून कल्पना हिने घर सावरायला सुरुवात केली. वडिलांचे छत्र हरपले त्यात तिचे बालपण सुद्धा हरवले. छोटी मोठी काम करत ती मोठी झाली.
अगोदर धुनी भांडी, घरकाम अशी कामे करता करता तिने सायकलवरून सिलिंडर पोहोचवायला सुरुवात केली. हे काम अवघड, मेहनतीचे असले तरी तिने ते जिद्दीने स्वीकारले. सुरुवातीला कल्पनाने 5 वर्षे सायकलने सिलिंडर पोहचवले. सायकलवर दिवसभरात जेमतेम 5 ते 7 सिलिंडर पोहचवता यायचे. त्यानंतर तिने जुनी स्कुटर विकत घेऊन सिलिंडर पोहचवण्यास सुरुवात केली आणि अगदी सहज ती सिलिंडर खांद्यावर टाकून घेऊन जायला लागली. सुरुवातीला हे काम कठीण आहे हे कसे जमणार असे म्हणणारे तिच्याकडे पाहतच राहिले. पण तिच्या जीवनातल्या संघर्षापुढे तिने हे काम जिद्दीने केले. आणि आज जवळपास 22 वर्षे ती काम नेटाने व धैर्याने करते आहे.लहानपणापासून पंढरपूरच्या पांडुरंगावर कल्पना हिची निस्सीम श्रद्धा आहे. आई आणि मोठ्या बहिणीवर अलोट प्रेम. वारकरी संप्रदाय स्वीकारला असल्याने दिवसभर कितीही दमलेल्या असल्या तरी कल्पना हिलाल या आपल्या आईसोबत हरिनाम सप्ताह असल्यास हमखास जातात.
वजन उचलणं हे सोपं काम नाही, हे समाजालाही मान्य आहे. म्हणूनच कल्पना हिलाल यांना सिलिंडर घेऊन गेल्यावर त्या घरातील गृहिणी त्यांची आपसूक चौकशी करून त्यांना चहा पाणी विचारते. कोणत्याही महिलेने त्यांच्या घरातील गॅसची टाकी संपली आहे, असा फोन करताच कल्पना ह्या तत्पर सेवा देतात. पुरुषाच्या खांद्याला खांदा लावून काम करणाऱ्या स्रियांबरोबरच आपल्या मनगटातील ताकदीने स्त्री कुठेच मागे नाही, हे दाखवून देणाऱ्या कल्पना हिलाल यांच्या या संघर्षाला व जिद्दीला सलाम!
