पनवेल - मावळ लोकसभा मतदार संघातून अजित पवार यांचे पुत्र पार्थ पवार हे लोकसभा निवडणूक लढवत आहेत. पार्थ पवार यांच्या पहिल्या भाषणापासून ते अगदी उलट्या ट्रेनचा प्रवास आणि सभा नसतानाही केलेल्या धावपळीवरून, अशा अनेक गोष्टींमुळे ते सोशल मीडियावर चांगलेच ट्रोल झाले आहेत. यावर पार्थ पवारच्या मातोश्री सुनेत्रा पवार यांनी प्रतिक्रिया दिली आहे.
पनवेल : मुलगा पार्थ पवार यांच्या प्रचारासाठी आल्यानंतर माध्यमांशी संवाद साधताना सुनेत्रा पवार
गेल्या काही दिवसांपासून अनेक कारणांमुळे पार्थ पवार ट्रोल होत आहेत. मात्र, निवडणूक म्हटलं की ट्रोलिंग होणारच. हे काही नवीन नाही, असे सांगून सुनेत्रा पवार यांनी पार्थ पवारांची पाठराखण केली आहे.
मुलगा पार्थ पवार यांच्या प्रचारासाठी आजोबा शरद पवार, वडील अजित पवार यांच्यापाठोपाठ आता आई सुनेत्रा पवार या देखील निवडणुकीच्या मैदानात उतरल्या आहेत. पार्थ पवार यांच्या प्रचारासाठी आई सुनेत्रा पवार यांनी नुकतीच पनवेलकरांची भेट घेतली. पनवेल, कळंबोली,कोपरा, खारघर या भागातील राष्ट्रवादी काँग्रेस आणि मित्र पक्षाच्या कार्यकर्त्यांच्या घरी जाम भेटी दिल्या.