रायगड - या लोकसभा निवडणुकीला मी विकासाचा मुद्दा घेऊन सामोरा जात आहे, असे वक्तव्य राष्ट्रवादी काँग्रेसचे लोकसभेचे उमेदवार सुनिल तटकरे यांनी केले. ते ईटीव्ही भारतच्या प्रतिनिधीशी रायगडमध्ये बोलत होते. माजी मुख्यमंत्री बॅ. ए. आर. अंतुले यांचे पुत्र नावेद यांच्या शिवसेनेत जाण्याने फारसा फरक पडणार नाही, असे त्यांनी यावेळी स्पष्ट केले.
नावेद अंतुले यांच्या शिवसेना प्रवेशामुळे फारसा फरक पडणार नसल्याचे तटकरे म्हणाले
सुनिल तटकरे यांचा २०१४ मध्ये निसटता पराभव झाला होता. यावेळी ते केंद्रीय मंत्री अनंत गीते यांच्याविरोधात लढत आहेत. ईटीव्ही भारतने त्यांच्याशी संवाद साधला. ते म्हणाले, की मी गेल्या ३५ वर्षांपासून समाजसेवा करत आहे. जनतेचे प्रश्न, समस्या सोडविण्यासाठी सातत्याने प्रयत्न करत आहे. २५ वर्षे विधीमंडळात, ३ वर्षे जिल्हा परिषद अध्यक्ष, ८ वर्षे काँग्रेस युवक अध्यक्ष म्हणून काम करण्याचा मला अनुभव आहे.