रायगड - डॉक्टरांची, रक्ताची कमतरता, इमारतीची दुरवस्था अशा समस्यांनी जिल्हा सामान्य रुग्णालय ग्रासले आहे. त्यातच गेल्या ५ महिन्यांपासून नेत्रकक्ष विभाग अंतर्गत दुरुस्ती कामामुळे बंद आहे. त्यामुळे रुग्णावर डोळ्यावरील शस्त्रक्रिया आणि उपचार बंद झाले आहेत. त्यामुळे डोळ्याच्या शस्त्रक्रियेसाठी रुग्णांना मुंबईमधील जे. जे. रुग्णालयात पाठविण्याची वेळ रुग्णालय प्रशासनावर आलेली आहे.
रायगड सामान्य रुग्णालयातील नेत्रकक्ष विभाग बंद
जिल्हा सामान्य रुग्णालयात डोळ्याच्या आजारावर उपचार करण्यासाठी नेत्रकक्ष विभागाची इमारत बांधण्यात आलेली आहे. संबंधित इमारतीची दुरवस्था झाली आहे. पावसाळ्यात शस्त्रक्रिया कक्षात पाणी पडण्यास सुरुवात झाली. त्यामुळे शस्त्रक्रिया कक्ष बंद करण्यात आले आहे. रुग्ण कक्षातही भींतीमधून आणि स्लॅबमधून पाणी पडत होते. त्यामुळे नेत्रकक्ष विभाग जून महिन्यापासून बंद ठेवण्यात आलेला आहे.