कंटेंनमेंट झोनमधील गावात प्रवेशावरुन पोलिसांसोबत झालेल्या वादातून महिलेची आत्महत्या

उंब्रज नं. 1 गावातील तपास नाक्यावर पोलीस व ग्रामस्थ शिंगोटे कुटुंबियांना समजविण्याचा प्रयत्न करत होते.यावेळी झालेल्या वादातून अनुजा रोहिदास शिंगोटे यांनी विषारी औषध प्राशन केल्यामुळे त्यांचा मृत्यू झाला.

जुन्नर(पुणे)-जुन्नर तालुक्यातील उंब्रज नं. 1 गावात कोरोनाचे रुग्ण आढळून आल्याने गावाला कंटेंनमेंट झोन जाहीर केला आहे. मात्र, गावात विनापरवाना प्रवेश करण्यावरुन पोलिसांसोबत झालेल्या वादात शेतकरी महिलेने पोलीस व नागरिकांसमोर विषारी औषध घेऊन आत्महत्या केल्याची घटना घडली आहे. अनुजा रोहिदास शिंगोटे, वय 45 असे आत्महत्या केलेल्या महिलेचे नाव आहे.

जुन्नर तालुक्यात कोरोनाचा संसर्ग दिवसेंदिवस वाढत असून रुग्णांच्या संख्येत ग्रामीण भागात झपाट्याने वाढ होत आहे. यामुळे कोरोना संसर्गाची साखळी तोडण्यासाठी कंटेंनमेंट झोन करण्यात येत आहेत. ओतुर पोलीस स्टेशनच्या हद्दीत उंब्रज नं. 1 या गावात पोलिसांच्या उपस्थितीत ग्रामस्थांनी कंटेंनमेंट झोन करुन गावात प्रवेश व बाहेर पडण्यास बंदी केली आहे .मात्र, मंगळवारी शिंगोटे कुटुंब टेम्पोतून भाजीपाला विक्रीसाठी घेऊन बाहेर पडले होते. सायंकाळच्या सुमारास गावात प्रवेश करत असताना प्रवेश करण्यावरुन पोलीस व शिंगोटे कुटुंबांत वाद झाला. दरम्यान, काहीच वेळात हा वाद विकोपाला जाऊन अनुजा शिंगोटे यांनी गावातील नागरिक व पोलिसांसमोर विषारी औषध प्राशन केले. त्यावेळी त्यांना तातडीने उपचारासाठी रुग्णालयात दाखल केले. मात्र, डॉक्टरांनी त्यांना मृत घोषित केले आहे.

उंब्रज नं. 1 गावातील तपास नाक्यावर पोलीस व ग्रामस्थ शिंगोटे कुटुंबियांना समजविण्याचा प्रयत्न करत होते. दरम्यान, हा वाद विकोपाला गेला होता. त्यावेळी रोहिदास शिंगोटे हे आत्महत्या करण्याच्या हेतूने विषारी औषध घेऊन आले. त्यावेळी झटापटीत औषध खाली पडले त्यावेळी त्यांच्या पत्नी अनुजा शिंगोटे यांनी हे विषारी औषध प्राशन केले.

दरम्यान, कोरोनाच्या महामारीच्या संकटात प्रत्येक नागरिक कोरोनावर मात करण्यासाठीची लढाई लढत आहे. पोलीस व प्रशासन दिवसरात्र मेहनत घेऊन कोरोनाचे संकटाची साखळी तोडण्यासाठी प्रयत्न करत आहे. नागरिकांनी सहकार्याची भूमिका घेऊन एकत्र येऊन कोरोनावर मात करण्याची गरज आहे.