पुणे-नाशिक महामार्गावर शिवशाही बसला अपघात ; १० प्रवासी जखमी

पुणे- नाशिक महामार्गावर कळंब येथे रविवारी(ता.२३) रात्री उशिरा नाशिकवरुन पुण्याला निघालेल्या शिवशाही बसचा अपघात झाला. शिवशाही बसमधील प्रवाशांना किरकोळ दुखापत झाली.

पुणे(राजगुरुनगर) - पुणे- नाशिक महामार्गावर कळंब येथे रविवारी(ता.२३) रात्री उशिरा नाशिकवरुन पुण्याला निघालेल्या शिवशाही बसचा अपघात झाला. शिवशाही बसमधील प्रवाशांना किरकोळ दुखापत झाली. मात्र, अपघातात शिवशाही बस पलटी झाल्याने एक तास वाहतूक कोंडी झाली होती. स्थानिक नागरिकांच्या मदतीने शिवशाही बसला बाजूला करण्यात यश आले. मात्र, वाहनांच्या लांबच लांब रांगा लागल्या होत्या.

शिवशाही बस ( एम.एच.०६ बी.डब्लू. ०६४१) नाशिकवरुन पुण्याच्या दिशेने जात होती. एका वाहनाला मागे टाकण्याच्या प्रयत्नात चालकाचा बसवरील अचानक ताबा सुटल्याने शिवशाही बस रस्त्यावर पलटी झाली. बसमध्ये १० प्रवासी होते. या सर्व प्रवाशांना किरकोळ दुखापत झाली असून त्यांच्यावर खाजगी रुग्णालयात उपचार सुरू आहेत लॉकडाऊननंतर एसटी बस सेवा नियम व अटींच्या अधीन राहून सुरू करण्यात आली आहे. अशातच शिवशाही बसच्या अपघाताची मालिका सुरु झाली आहे. प्रवासादरम्यान कोरोनाची भिती त्यातून आता महामार्गावर होणाऱ्या अपघातामुळे प्रवाशांमध्ये भितीचे वातावरण निर्माण झाले आहे.