दफनभूमीसाठी महापालिकेच्या आवारात मृतदेह आणून आंदोलन

खराडी परिसरात मुस्लीम समाजाची दफनभूमी नाही. दफनभूमी व्हावी यासाठी मागील ३ वर्षांपासून सातत्याने पाठपुरावा केला जात आहे. परंतु, प्रशासनाकडून याकडे दुर्लक्ष केले जात आहे. शेवटी गुरुवारी (ता.07) एका व्यक्तीचा मृतदेह महापालिकेच्या आवारात आणून दफणभूमीसाठी तत्काळ जागा उपलब्ध करून द्यावी, अशी मागणी करण्यात आली.

पुणे -खराडी परिसरात दफनभूमीसाठी जागा उपलब्ध करून द्यावी, या मागणीसाठी पुणे महापालिकेच्या आवारात मृतदेह आणून मुस्लीम समाजाकडून आंदोलन करण्यात आले. माजी आमदार बापूसाहेब पठारे यांनी या आंदोलनाचे नेतृत्व केले.

खराडी परिसरात मुस्लीम समाजाची दफनभूमी नाही. दफनभूमी व्हावी यासाठी मागील ३ वर्षांपासून सातत्याने पाठपुरावा केला जात आहे. परंतु, प्रशासनाकडून याकडे दुर्लक्ष केले जात आहे. शेवटी गुरुवारी (ता.07) एका व्यक्तीचा मृतदेह महापालिकेच्या आवारात आणून दफणभूमीसाठी तत्काळ जागा उपलब्ध करून द्यावी, अशी मागणी करण्यात आली.

यावेळी बोलताना बापूसाहेब पठारे म्हणाले की, आम्ही दफनभूमीसाठी सातत्याने मागणी करत आहोत. मात्र, महापालिका याकडे दुर्लक्ष करीत आहे. कोणी मृत झाल्यास खराडी परिसरातील रहिवाशांना अडचणींना तोंड द्यावे लागते. त्यामुळेच आम्हाला प्रशासनाचा निषेध करण्यासाठी महापालिकेच्या आवारात मृतदेह आणावा लागला.

दरम्यान, महापौर मुक्ता टिळक यांनी दफनभूमीचा प्रश्न लवकरच मार्गी लावू, असे आश्वासन दिल्यानंतर हे आंदोलन लगेच मागे घेण्यात आले.