बारामती - मोटरसायकल चोरणाऱ्या मामा भाचाला तालुका पोलिसांनी अटक केली. त्यांच्याकडून १ लाख ८० हजार रुपयांच्या सहा मोटारसायकली हस्तगत करण्यात पोलिसांना यश आले आहे. संदीप बाळू माने (वय ३५ वर्ष,रा.खंडोबा नगर,बारामती) व स्वप्नील काळूराम भोसले (वय २७ वर्षे ,राहणार.निरवागज, ता. बारामती) अशी मोटरसायकल चोरणाऱ्या मामा भाच्यांची नावे आहेत.
मामा सराईत मोटरसायकल चोर-
मागील काही दिवसांपासून बारामती शहर व एमआयडीसी परिसरातून मोटार सायकल चोरीच्या घटना वाढल्या होत्या. त्या अनुषंगाने तालुका पोलिसांनी गोपनीय माहितीच्या आधारावरून मामा भाचाच्या जोडीला ताब्यात घेतले. त्यांची कसून चौकशी केली असता बारामती तालुका व बारामती शहर पोलीस ठाण्याच्या हद्दीतून मागील दोन वर्षापासून २ स्टार सिटी, १ पॅशन, २ स्प्लेंडर, १ सुझुकी, अशा सहा मोटरसायकली चोरल्याचे समोर आले आहे. या मामा भाच्यांना अटक करण्यात आली आहे. अटकेतील आरोपी संदीप माने हा मोटरसायकल चोरी करणारा सराईत असून त्याच्यावर यापूर्वी हडपसर पोलीस स्टेशन, बारामती तालुका पोलीस स्टेशन येथे मोटार सायकल चोरीचे गुन्हे दाखल आहेत.