पुणे- मुंबई-पुणे द्रुतगति मार्गावर आज दुपारी 2 तासांचा मेगा ब्लॉक घेण्यात येणार आहे. अशी माहिती महामार्ग सुरक्षा पथक, पुणे प्रादेशिक विभाग यांच्या वतीने देण्यात आली आहे. दुपारी १२ ते २ यावेळेत पुणे लेनवर हा ब्लॉक असणार असून पुण्याकडे जाणारी वाहतूक पूर्णपणे बंद असणार आहे.
द्रुतगती मार्गावरील किलोमीटर ६५.७०० येथे ओव्हर हेड गॅन्ट्री (फलक) बसविण्याचे कामकाज करण्यात येणार आहे. हलकी चारचाकी व इतर प्रवाशी वाहने द्रुतगति मार्गावरील कुसगाव टोलनाका येथून जुना मुंबई-पुणे महार्गाने पुण्याकडे वळविण्यात येणार आहेत. तर पुण्याकडे जाणारी अवजड आणि मालवाहतूक वाहने खालापूर टोलनाका व कुसगाव टोलनाक्याच्या पूर्वी किलोमीटर ५२.५०० येथे थांबविण्यात येणार आहे. याची नोंद प्रवाशी आणि चालकांनी घ्यावी असे आवाहन महामार्ग सुरक्षा पथक यांच्याकडून करण्यात आले आहे.