पुणे - लग्नापूर्वी प्रेमसंबंध असलेल्या पत्नीच्या प्रियकराचा भरदिवसा कोयत्याने वार करून खून करण्यात आल्याची धक्कादायक घटना पिंपरी-चिंचवडच्या सांगवी पोलीस स्टेशन हद्दीत घडली आहे. सौरभ व्यंकट जाधव (वय 28 ) असे खून झालेल्या तरुणाचे नाव आहे. रविवारी दुपारच्या सुमारास ही घटना घडली असून या प्रकरणी दोघांवर गुन्हा दाखल करण्यात आला आहे. पोलीस आरोपींचा शोध घेत आहेत.
पोलिसांनी दिलेल्या माहितीनुसार, आरोपी अय्याजच्या पत्नीने मृत सौरभशी विवाहापूर्वी प्रेमसंबध होते. त्यांची ओळख सुरुवातीला फेसबुकच्या माध्यमातून झाली. यातून त्यांनी फोन नंबरची देवाण-घेवाण केली आणि व्हाट्सअ‌ॅपच्या माध्यमातून ते एकमेकांच्या संपर्कात होते. ही बाब अय्याजला कळाली. तेव्हा त्याने पत्नीला समजावून हे प्रकरण मिटवले. पण त्याच्या मनात सौरभविषयी राग होता.