परतीच्या पावसाचे थैमान.. मावळमध्ये भात पिकाचे मोठे नुकसान

रविवारी रात्री झालेल्या मुसळधार पावसात मावळ मधील भात पिकाचे मोठे नुकसान झाले आहे. अगोदरच्या पावसातून काही प्रमाणात भात शेती बचावली होती. आता मात्र, मावळमधील बहुतांश भात शेतीचे नुकसान झाल्याचं शेतकऱ्यांचे म्हणणं आहे.

पुणे- गेल्या चार दिवसांपासून पिंपरी-चिंचवडसह पुणे जिल्ह्यातील मावळ तालुक्यात परतीच्या मुसळधार पावसाने थैमान घातले आहे. यात, भात पिकवणाऱ्या शेतकऱ्यांचे अतोनात नुकसान झाले असून अद्याप सरकार दरबारातील अधिकारी, कर्मचारी न आल्याने पंचनामे झालेले नाहीत. त्यामुळे नुकसान भरपाई मिळणार की नाही हा प्रश्न शेतकऱ्यांना सतावत आहे. दरम्यान प्रशासनाने योग्य ती दखल घ्यावी, अशी मागणी मावळ तालुक्यातील शेतकऱ्यांनी ठाकरे सरकारकडे केली आहे.

गेल्या चार ते पाच दिवसांपासून पुणे, पिंपरी-चिंचवडसह मावळ तालुक्यात परतीचा मुसळधार पाऊस बरसत आहे. येन भात काढणीच्या वेळी पावसाने हजेरी लावल्याने शेतकरी चिंतेत असून मावळ तालुका वगळता इतर ठिकाणी राजकीय नेते पावसामुळे नुकसान झालेल्या ठिकाणी भेटी देत आहेत. परंतु, भात शेतीचे माहेरघर असणाऱ्या मावळाकडे लक्ष द्यायला कोणत्या नेत्याला वेळ नसल्याचं यातून अधोरेखित होत आहे. रविवारी रात्री झालेल्या मुसळधार पावसात मावळ मधील भात पिकाचे नुकसान झाले आहे. अगोदरच्या पावसातून काही प्रमाणात भात शेती बचावली होती. आता मात्र, मावळ मधील बहुतांश भात शेतीचे नुकसान झाल्याचं शेतकऱ्यांचे म्हणणं आहे. भात पिकांची पाहणी करून शेतकऱ्यांना शासनाने योग्य ती नुकसान भरपाई द्यावी, अशी मागणी नुकसानग्रस्त शेतकरी बबन कोलेकर यांनी केले आहे.