CORONA : साहेब..! पोटच्या मुलांप्रमाणं फुलं जपली... पण, कोरोना आला अन् सर्व फुलांवर नांगर फिरवला

अचानक उद्भवलेल्या कोरोना विषाणूचा फटका सर्वच क्षेत्राला बसलाय. मागील वीस दिवसांपासून संपूर्ण भारतात लॉकडाऊन आहे. अत्यावश्यक सेवा वगळता सर्व व्यवहार ठप्प आहेत. फुलशेतीला याचा फटका मोठ्या प्रमाणात बसला आहे.

पुणे - 'आमच्याकडे फुलांशिवाय दुसरी शेती नाही. फुलांना पोटच्या लेकरासारखं वाढवतो. त्याची तोडणी करतो आणि पुणे, मुंबईला विकायला पाठवतो. पण, कोरोना आला अन् आमच्या फुलशेतीवर संकट कोसळलं. फुले खराब होवू लागली अन् शेवटी आम्हाला फुलावर नांगर फिरवावा लागला...' ही कहाणी आहे पुण्यातील निरगुडी गावातील फुलशेती करणाऱ्या शेतकऱ्यांची.

फुलांची मागणी घटली.. अन् शेतकऱ्याचे अर्थकारणचं बिघडले..

पुण्यापासून २५ किमी अंतरावर असलेल्या निरगुडी गावातील प्रत्येक घरात फुलशेती केली जाते. फुलशेतीतून मिळणाऱ्या उत्पन्नावरच या गावाचे अर्थकारण चालते. मार्च, एप्रिल, मे हे तीन महिने लगीनसराईचे आहेत. लग्न सोहळ्यात सजावटीसाठी फुलांची मोठी मागणी असते. मात्र, यंदाचा हंगाम सुरू होण्यापूर्वीच कोरोनाचे संकट या शेतकऱ्यांसमोर येऊन उभे राहिले. लग्नसोहळे, जाहीर कार्यक्रम रद्द करण्यात आले. त्यामुळे फुलांची मागणीही थांबली. फुले शेतातच झाडाला कोमेजून गेली. परिणामी शेतकऱ्यांना फुलशेतात नांगर फिरवण्याची वेळ आली. पोटच्या पोरांप्रमाणे जपलेली फुलशेती डोळ्यांसमोर नष्ट होताना पाहण्याची वेळ येथील शेतकऱ्यांवर आली.

या गावातील तरुण शेतकरी असलेल्या सुधीर मगर यांच्या शेतात आम्ही प्रत्यक्ष जाऊन भेट दिली. यावेळी त्यांनी सांगितले की, सजावटीसाठी लागणाऱ्या पानाफुलांची आम्ही शेती करतो. हे तीन महिनेचं आमच्यासाठी कमाईचे दिवस असतात. यासाठी दोन-तीन महिने आधीपासून तयारी केलेली असते. एक एकरसाठी साधारण लाख, सव्वालाख रुपये खर्च येतो. पण, यंदा हा सर्व खर्च पाण्यात गेला आहे. त्यामुळे आता ही फुले फेकून देण्याशिवाय दुसरा कोणताही पर्याय शिल्लक नसल्याचे त्यांनी सांगितले. मात्र, असे असले तरीही कोरोनाचे संकट लवकर नष्ट होईल आणि पूर्वीसारखचे पुन्हा एकदा सर्वकाही सुरळीत होईल, असा आशावादही त्यांनी व्यक्त केलाय.