Kasba By Election: कसबा पोटनिवडणुकीत मतदारांचे मन जिंकण्यासाठी राजकीय पक्षात स्पर्धा, पहा कोण काय म्हणाले?

कसबा पोटनिवडणुकीचा प्रचार रंगात आला आहे. मनसे नेते बाळासाहेब नांदगावकर, उपमुख्यमंत्री देवेंद्र फडणवीस आणि काँग्रेस नेते मोहन जोशी यांनी निवडणुकीच्या प्रचारात सहभाग घेतलला. यावेळी त्यांनी मतदारांचे मन जिंकण्यासाठी प्रयत्न केले.

पुणे :कसबा पोटनिवडणुकीमध्ये विरोधी पक्षांकडून निगेटिव्ह सेट करण्याचा प्रयत्न केला जातो. ही लढाई रासने विरुद्ध धंगेकर असलेल्या असे बोलले जाते. परंतु ही लढाई आता हिंदुत्ववादी विरोधी, राष्ट्र विचारविरोधी, काश्मीर विरोधी लोकांची आहे. त्यामुळे कसब्यात राष्ट्र विचाराने प्रेरित लोक असल्याने ते भाजपाला मतदान करतील, असे म्हणत उपमुख्यमंत्री देवेंद्र फडवणीस यांनी गुरूवारी दुपारी राष्ट्रवादी काँग्रेसवर जोरदार टीका केलेली आहे.

हिंदुत्ववादी कसब्याला हरवण्याची जंग :उपमुख्यमंत्री देवेंद्र फडणीस यांनी कसबे उमेदवार हेमंत रासने यांच्यासाठी जोरदार हिंदुत्ववादी भाषण करत ही लढाई हिंदुत्ववादी असल्याचे स्पष्ट केले. गुरूवारी त्यांनी भाषणाची सुरुवात 'महादेव की जय' असे म्हणत केली. खरं तर ही पोट निवडणूक मुक्ताताई यांच्या दुःखद निधन झाल्याने लागलेली आहे. एक प्रकारे कसब्यामध्ये हिंदुत्ववादी कसब्याला हरवण्याची जंग विरोधी पक्षांकडून चालू आहे, परंतु कसबा हा राष्ट्र विचाराने प्रेरित आहे. यात कसब्यानेच राष्ट्राच्या विचारातून स्वातंत्र्य विचार दिलेला आहे. त्यामुळे इथली जनता ही कमळाला मतदान करेल. हेमंत रासने यांना प्रचंड मताने निवडून देईल, असा विश्वास त्यांनी यावेळी व्यक्त केला. मूर्ती लहान आहे, पण कीर्ती महान असल्याचे सुद्धा देवेंद्र फडवणीस यांनी हेमंत रासने यांना उद्देशून म्हणाले आहेत.

विद्यार्थ्यांसह कार्यकर्त्यांची घोषणाबाजीउपमुख्यमंत्री देवेंद्र फडणवीस यांनी गुरूवारी विधानसभेचे उमेदवार हेमंत रासने यांच्या प्रचारार्थ पायी यात्रा काढली. या रॅलीमध्येच पीएमटी बसमधील शाळेचे विद्यार्थीसुद्धा बसलेले होते. त्यांनी रॅली पाहताच मोदी, मोदी अशा घोषणा सुरू केल्या. देवेंद्र फडवणीस यांनी सुद्धा या विद्यार्थ्यांचा उत्साह बघून त्यांना हात उंचावून नारेबाजी केली. या रॅलीत सहभागी असलेले सगळेच कार्यकर्तेसुद्धा मोदी मोदी, शिवाजी महाराज की जय अशा घोषणा देत होते.

धनशक्तीच्या विरोधात जनशक्तीचा विजय :कसब्यात भाजप महायुतीच्या‌ उमेदवारासाठी केंद्रीय मंत्र्यासह राज्यातील मंत्री, मुख्यमंत्री, उपमुख्यमंत्री तळ ठोकून आहेत. त्यांच्याकडून साम-दाम-दंड-भेद वापरले जात आहे, पोलिस व प्रशासकीय यंत्रणेचा गैरवापर केला जात आहे, असा आरोप काँग्रेसचे प्रदेश उपाध्यक्ष व माजी आमदार मोहन जोशी यांनी केला. तसेच या निवडणुकीत धनशक्तीच्या विरोधात जनशक्तीचा विजय होणार असल्याने कसब्यात यावेळी नक्कीच परीवर्तन होणार आहे, असा‌ विश्वासही जोशी यांनी व्यक्त केला. कसबा पेठ विधानसभा पोटनिवडणुक महाविकास आघाडीचे उमेदवार रविंद्र धंगेकर यांच्या प्रचारार्थ काँग्रेस भवन येथे गुरुवारी आयोजित केलेल्या पत्रकार परिषदेत ते बोलत होते.

एक जवळीक नातं : महाराष्ट्र नवनिर्माण सेनेचे नेते बाळा नांदगावकर यांनी गुरूवारी खासदार गिरीश बापट यांची भेट घेतली. यावेळी त्यांनी बापट यांच्या तब्येतीची विचारपूस केली. यावेळी ते म्हणाले की, खासदार गिरीश बापट हे माझे खूप जुने सहकारी आहे. विधानसभेत आम्ही एकत्र काम केले आहे. त्यामुळे माझे आणि त्यांचे एक जवळीक नातं आहे. मागच्या वेळेस जेव्हा मी आलो होतो तेव्हा, सव्वा तास आमच्यात चर्चा झाली. आत्ता पुन्हा एकदा आमच्यात अर्धा तास चर्चा झाली आहे. सध्या त्यांच्यावर उपचार सुरू होत असून लवकरच ते बरे होऊन बाहेर येणार आहे. तसेच मी इथ असून देखील पक्षासाठी जी काही मदत करायची आहे. ती करतच आहे, असे यावेळी नांदगावकर म्हणाले.