पिंपरीत कोरोनाच्या भीतीने काही तास मृतदेह घरातच पडून; सामाजिक कार्यकर्त्याने केले अंत्यसंस्कार

पिंपरी चिंचवडमध्ये एका कामगाराचा मृत्यू झाल्याची घटना घडली होती. मात्र कोरोनाच्या भीतीमुळे त्याच्या मृतदेहाला परिसरातील कोणी व्यक्ती हात लावण्यास धजावत नसल्याने त्याचा मृतदेह काही तास घरातच पडून राहल्याचा प्रकार घडला. दरम्यान एका सामाजिक कार्यकर्त्याने पुढाकार घेऊन त्याच्यावर अंत्यसंस्कार केले.

पुणे - पिंपरी-चिंचवड शहरात कोरोनाचा संसर्ग हळूहळू कमी होत चालला असल्याचे आकडेवारी वरून दिसत आहे. या महामारीबद्दल भीती देखील कमी झाल्याने अनेक जण रस्त्यावर बिनधास्त होऊन फिरत आहेत. परंतु, पिंपरीच्या महात्मा फुले नगर येथे घरातच हृदय विकाराच्या धक्क्याने एका कामगाराचा मृत्यू झाला. मात्र, कोरोनाच्या भीतीने त्याचा मृतदेह काही तास घरात पडून राहिल्याचा असंवेदनशील प्रकार समोर आला आहे. कोरोनाच्या भीतीने तो मृतदेह बाहेर काढण्यासाठी परिसरातील एकही व्यक्ती धजावला नाही. अखेर नव्हता अखेर सामाजिक कार्यकर्ते जितेंद्र ननावरे यांनी पुढे येऊन तो मृतदेह बाहेर काढून रुग्णालयात नेला. विधिवत त्यांच्यावर अंत्यसंस्कार केले. हे सर्व पाहता कोरोनामुळे अनेक ठिकाणी संवेदनाशून्य समाज, तर ननावरे यांच्या सारख्या कार्यकर्त्यामुळे माणुसकी जिवंत असल्याचं दिसत आहे.

पिंपरी-चिंचवडमधील महात्मा फुले नगर येथे प्रसाद कुमार गुप्ता नावाचा व्यक्ती जो मूळ चा बिहार येथील आहे. तो कुटुंबासह पिंपरीत राहायचा, शहरात मोलमजुरी करू कुटुंबाचा उदरनिर्वाह भागवत असे. परंतु, सहा महिन्यांपूर्वी कोरोनाचे मोठे संकट शहरासह जगावर आले आणि लॉकडाऊन घोषीत करण्यात आले, रोजगार ठप्प झाला. काही दिवसांनी मयत प्रसाद यांनी त्यांचं कुटुंब मूळ गावी बिहार येथे हलवले ते स्वतः पुन्हा शहरात दाखल झाले. घरात ते एकटेच राहात होते. परंतु, शुक्रवारी पहाटे च्या सुमारास हृदय विकाराच्या झटक्याने त्यांचा जागीच मृत्यू झाला. काही तास त्यांचा मृतदेह घरातच पडून होता. शेजाऱ्यांनी हा व्यक्ती बाहेर का येत नाही म्हणून पाहिले असता त्यांचा मृतदेह दिसला. मात्र, कोरोनाच्या भीतीमुळे एकही व्यक्ती त्यांच्या मृतदेहाला हात लावायला तयार नव्हता.अखेर सामाजिक कार्यकर्ते जितेंद्र ननावरे आणि त्यांच्या सहकारी मित्रांनी मृतदेह घराबाहेर काढून तो यशवंतराव चव्हाण स्मृती रुग्णालयात नेला. मृत्यू कशामुळे झाला यासाठी शवविच्छेदन करण्यास डॉक्टरांना सांगितले. तेव्हा, त्यांचा मृत्यू हा हृदय विकाराच्या झटक्याने झाल्याचे स्पष्ट झाले. रात्री उशिरा मयत कामगार प्रसाद यांच्यावर जितेंद्र ननावरे यांनी विधिवत अंत्यसंस्कार केले. त्या अगोदर त्यांच्या घरच्या व्यक्तींना व्हिडिओ कॉल द्वारे अंतिम दर्शन घडवून आणले, असे जितेंद्र ननावरे यांनी 'ईटीव्ही' शी बोलताना सांगितले आहे. खर तर कोरोनामुळे नागरिकांमध्ये भीतीचे वातावरण आहे, मात्र, भीती इतकी नसावी की माणूस माणसापासून दुरावले.