राज्यात हवा बदलली आहे ..असं फक्त पवारानांच वाटते, चंद्रकांत पाटलांचा टोला

राज्यात हवा बदलली आहे असे फक्त शरद पवार यांनाच वाटते. त्यांच्या पक्षातील लोकांना आणि जनतेला असे काही वाटत नसल्याचे वक्तव्य भाजपचे प्रदेशाध्यक्ष आणि कोथरुड विधानसभेचे उमेदवार चंद्रकांत पाटील यांनी केले.

पुणे - राज्यात हवा बदलली आहे, असे फक्त शरद पवार यांनाच वाटते. त्यांच्या पक्षातील लोकांना आणि जनतेला असे काही वाटत नसल्याचे वक्तव्य भाजपचे प्रदेशाध्यक्ष आणि कोथरुड विधानसभेचे उमेदवार चंद्रकांत पाटील यांनी केले. राज्यात पुन्हा युतीचेच सरकार येईल, असा विश्वसाही यावेळी पाटील यांनी व्यक्त केला.

सध्याची परिस्थिती पाहता आपकी बार 220 नाहीतर 250 जागा भाजप महायुतीला मिळतील, असा दावा चंद्रकांत पाटील यांनी केला. कोथरूड विधानसभा मतदारसंघातील विविध मतदान केंद्रावर पाटील यांनी भेटी दिल्या. एकंदरीतच या निवडणुकीसाठी लोकांचा मोठा उत्साह जाणवत आहे. लोक मोठ्या संख्येने मतदानासाठी बाहेर पडले असल्याचे चंद्रकांत पाटील म्हणाले.

१ लाख ६० हजारांपेक्षा जास्त मताधिक्क्याने विजयी होईल
कोथरूड विधानसभा मतदारसंघातून १ लाख ६० हजारांपेक्षा जास्त मताधिक्क्याने विजयी होईल, असा दावा पाटील यांनी केला. राष्ट्रवादी काँग्रेसचे नेते धनंजय मुंडे यांनी पंकजा मुंडे यांच्या संदर्भात वापरलेली भाषा अत्यंत निंदनीय आहे. त्याचा निषेध करत असून राजकारणाची पातळी अत्यंत खालावलेली असल्याचे पाटील म्हणाले.