पुणे - अचलपूर मतदारसंघातील आमदार बच्चू कडू यांच्यावर पुण्यातील सहकारनगर पोलीस स्टेशनमध्ये गुन्हा दाखल करण्यात आला आहे. बच्चू कडू यांनी फोनवरून धमकी दिल्याचे सांगत सामाजिक कार्यकर्त्या तृप्ती देसाईंनी याप्रकरणी तक्रार दिली आहे. तक्रारीवरुन बच्चू कडू यांच्यावर अदखलपात्र गुन्हा दाखल करण्यात आला आहे.
तृप्ती देसाईंना धमकावल्याप्रकरणी आमदार बच्चू कडू यांच्यावर गुन्हा दाखल
बच्चू कडू यांनी फोनवरून धमकी दिल्याचे सांगत सामाजिक कार्यकर्त्या तृप्ती देसाईंनी याप्रकरणी तक्रार दिली आहे.
तृप्ती देसाई आणि बच्चू कडू
काही दिवसांपूर्वी तृप्ती देसाईंनी बच्चू कडू यांच्या विरोधात फेसबुकवर एक पोस्ट लिहली होती. शेतकऱ्यांचे नेते म्हणवून घेणारे बच्चू कडू शिवसेना आणि भाजपविरोधात आंदोलन का करत नाहीत? विदर्भात शेतकरी अडचणीत आहे" असा सवाल देसाई यांनी फेसबुक पोस्टद्वारे विचारला होता. यावर प्रहार जनशक्ती पक्षाच्या कार्यकर्त्यांनी शिवीगाळ, बदनामीकारक टिप्पणी करून मानसिक त्रास होईल अशा कमेंट्स केल्याचे तृप्ती देसाई यांनी सांगितले.
या घटनेनंतर बच्चू कडू यांनी धमकी दिल्याचे देसाई यांनी सांगितले.तुम्ही मला फेसबुकवर उपदेश करू नका, स्वतःला मोठे समजू नका, शहाणपणा करू नका, अन्यथा तुम्हाला परिणामांना सामोरे जावे लागेल, अशी धमकी दिल्याचे त्यांनी माध्यमांना सांगितले. तृप्ती देसाई या सामाजिक कार्यकर्त्या असून त्यांनी महिला आणि सामाजिक प्रश्नांना घेऊन आंदोलने केले आहे.