पुणे - चासकमान जलाशय परिसरातील बुरसेवाडी डॅम रस्त्यावर बिबट्याच्या बछड्याचा मृत्यू झाला. वाहनाने दिलेल्या धडकेत या बछड्याचा मृत्यू झाल्याचे आज सकाळी समोर आले. बिबट्याचे शवविच्छेदन करून त्याच्यावर अंत्यसंस्कार करण्यात येणार असल्याचे वनविभागाने सांगितले.
बिबट्याच्या बछड्याचा अपघाती मृत्यू झाला मागील काही दिवसांपासून चासकमान जलाशय परिसरात पाण्याची व्यवस्था असल्याने बिबट मादी व तिच्या बछड्यांचे वास्तव्य नागरिकांनी अनुभवले आहे. काल (बुधवारी) रात्रीच्या सुमारास बिबट्याचा बछडा शिकारीच्या शोधात बुरसेवाडी डॅम रस्त्यालगत जात असताना अचानक अज्ञात वाहनाची जोरदार धडक लागून बिबट्याचा मृत्यू झाल्याचे वन विभागाने सांगितले.
बिबटे शिकारीच्या शोधात रात्रीच्या अंधारात लोकवस्ती व रस्त्यालगत येऊन भटकंती करत असल्याचे निदर्शनास येत आहे. त्यामुळे बिबट्याचे अपघात व अपघाती मृत्यू होण्याच्या घटना दिवसेंदिवस वाढतच आहेत. वनविभागाकडून बिबट्यांच्या संगोपनासाठी उपाययोजना करण्याची मागणी बुरसेवाडी ग्रामपंचायत सदस्य अरुण गुंडाळ यांनी केली आहे.
