बारामतीतील विविध योजनेच्या लाभार्थ्यांसाठी तीन कोटी प्राप्त

केंद्र शासन तसेच राज्य शासनाच्या सामाजिक न्याय व विशेष सहाय्य विभागाकडून विविध योजनेद्वारे देण्यात येणाऱ्या लाभाची रक्कम एप्रिल ते जून महिन्यांच्या कालावधीचे एकत्रितपणे देण्यासाठी बारामती तालुक्यातील 11 हजार 342 लाभार्थ्यांसाठी 3 कोटी 88 लाख 4 हजार रुपये 1 मे रोजी देण्यात येणार आहे.

बारामती/पुणे - कोरोनामुळे निर्माण झालेली परिस्थिती विचारात घेऊन केंद्र सरकारच्या तसेच राज्य सरकारच्या विविध योजनेचा लाभ लाभार्थ्यांना एप्रिल ते जून या ३ महिन्यांच्या कालावधीचे अर्थसहाय्य एकत्रितपणे एप्रिल महिन्यात लाभार्थ्यांच्या वैयक्तिक खात्यावर जमा करण्याचे आदेश सामाजिक न्याय व विशेष सहाय्य विभागाकडून देण्यात आले आहेत. त्यानुसार बारामती तालुक्यातील 11 हजार 342 लाभार्थ्यांच्या वैयक्तिक खात्यावर 1 मे रोजी अनुदानाची रक्कम जमा करण्यात येणार आहे. यासाठी शासनाकडून 3 कोटी 88 लाख 4 हजार रुपये देण्यात आले आहेत.


समाजातील गरजू विधवा, परितक्त्या, अपंग, वयोवृद्ध, निराधारांना केंद्र व राज्य शासनाच्या सामाजिक न्याय व विशेष सहाय्य विभागाकडून अर्थसाहाय्य केले जाते. त्यानुसार शासनाच्या सामाजिक न्याय व विशेष सहाय्य विभागाकडून लाभार्थ्यांच्या खात्यावर अनुदानाची रक्कम जमा करण्याचे आदेश देण्यात आले आहेत. तसेच इंदिरा गांधी वृद्धापकाळ निवृत्ती वेतन योजना, इंदिरा गांधी विधवा निवृत्ती वेतन योजना, इंदिरा गांधी अपंग निवृत्ती वेतन योजनेच्या लाभार्थ्यांना नियमित अनुदानाशिवाय एप्रिल व मे महिन्यात प्रत्येकी ५०० रुपये सानुग्रह अनुदान देण्याचेही आदेश देण्यात आले आहेत.

बारामती तालुक्यातील लाभार्थी व अनुदानाची रक्कम
योजनेचे नाव	लाभार्थी संख्या	अनुदान वाटप	सानुग्रह अनुदान वाटप	एकूण वाटप
वृध्दकाळ निवृत्ती योजना	1 हजार 801	10 लाख 80 हजार 600	18 लाख 1 हजार	28 लाख 81हजार 600
विधवा निवृत्ती योजना	41	36 हजार 900	41 हजार	77 हजार 900
दिव्यांग निवृत्ती योजना	5	4 हजार 500	5 हजार	9 हजार 500
संजय गांधी योजना	4 हजार 146	1 कोटी 16 लाख 99 हजार 100	-	11 कोटी 69 हजार 9 हजार 100 (सर्व साधारण)
संजय गांधी योजना	836	23 लाख 68 हजार 200	-	23 लाख 68 हजार 200 (अ.जाती)
श्रावणबाळ योजना	3 हजार 735	1 कोटी 36 लाख 83 हजार 200	-	1 कोटी 36 लाख 83 हजार 200 (सर्व साधारण)
श्रावण योजना	778	21 लाख 64 हजार 500	-	21 लाख 64 हजार 500 (अ.जाती)
एकूण	11 हजार 342	3 कोटी 10 लाख 37 हजार	18 लाख 47 हजार	3 कोटी 28 लाख 84 हजार