..आम्ही तुम्हाला ४ जागा देतो; प्रकाश आंबेडकरांचा काँग्रेसवर निशाणा

काँग्रेसचे नेते सुरुवातीला आम्हाला म्हणाले की आम्हाला एम. आय. एम. चालणार नाही. त्यांचा नेता नको. मात्र, त्यांची मते चालतात का? असा देखील सवाल आंबेडकरांनी उपस्थित केला.

परभणी - काँग्रेसने दिलेली ४ जागांची ऑफर धुडकावत वंचित बहुजन आघाडीने मराठवाड्यातील लोकसभेच्या चार जागेवरील उमेदवार जाहीर केले. आज परभणीतील सभेत प्रकाश आंबेडकर यांनी उमेदवारांच्या नावांची घोषणा केली. यावेळी त्यांनी ४ जागांची ऑफर देणाऱ्या काँग्रेसला 'तुम्ही आम्हाला काय चार जागा देणार, आमच्या सोबत या आम्ही तुम्हाला चार जागा देतो. मुकाट्याने घ्या नाही तर तुमची फजिती होईल, असा टोला लगावला.

परभणीतील नूतन विद्यालयाच्या मैदानावर वंचित बहुजन आघाडीची सत्ता संपादन सभा संध्याकाळी पार पडली. यावेळी प्रकाश आंबेडकर बोलत होते. पुढे ते म्हणाले, कश्मीरमध्ये जवानांवर दहशतवाद्यांनी हल्ला केला. ४० पेक्षा अधिक जवान शहीद झाले. या जवानांवर हल्ला होणार असल्याची माहिती देशाच्या गुप्तहेरांनी जीव धोक्यात घालून संबंधित यंत्रणेला दिली होती. ती माहिती सरकारपर्यंत पोहोचली. मात्र, त्याची दखल का घेतली नाही? हा दोष कोणाचा? यामध्ये दोषी असणाऱ्यांवर कारवाई झाली पाहिजे, अशी मागणीही यावेळी आंबेडकर यांनी केली. या जवानांना अर्ध लष्करी जवान मानले जाते. मात्र, त्यांनी देशासाठी जीव गमावला. त्यांना शहीद ही उपाधी सरकार देणार की नाही? असा सवाल देखील त्यांनी यावेळी उपस्थित केला.

पुढे म्हणाले, काँग्रेसचे नेते सुरुवातीला आम्हाला म्हणाले की आम्हाला एम. आय. एम. चालणार नाही. त्यांचा नेता नको. मात्र, त्यांची मते चालतात का? असा देखील सवाल आंबेडकरांनी उपस्थित केला.

मराठवाड्यातील चार उमेदवार जाहीर -

दरम्यान, सभेच्या सुरुवातीलाच प्रकाश प्रकाश आंबेडकरांनी मराठवाड्यातील ४ लोकसभा मतदारसंघात वंचित बहुजन आघाडीच्यावतीने उभ्या राहणाऱ्या उमेदवारांची नावे घोषीत केली. यामध्ये औरंगाबाद लोकसभेसाठी माजी न्यायमूर्ती बी. जी. कोळसे पाटील, बीडसाठी कैकाडी समाजाचे नेते प्रा. विष्णू जाधव, उस्मानाबाद धनगर समाजाचे नेते अरुण सलगर, जालना लोकसभेसाठी विश्वकर्मा समाजाचे शरदचंद्र वानखेडे यांचे नाव जाहीर केले आहे. दरम्यान, परभणी आणि हिंगोली लोकसभेच्या उमेदवारांची नावे २३ फेब्रुवारीला जाहीर करण्यात येणार असल्याचे त्यांनी यावेळी सांगितले. या सभेच्या व्यासपीठावर माजी आमदार लक्ष्मण माने, धनगर समाजाचे नेते खरात, एमआयएम व इतर बहुजन समाजाचे नेते आणि परभणी, नांदेड व औरंगाबाद येथील पदाधिकारी उपस्थित होते.