परभणी - शहरात काही दिवसांपूर्वी कागदपत्रांची तपासणी करत उपप्रादेशिक परिवहन विभागाने सुमारे ५०० ऑटोवर कारवाई केली होती. यामध्ये कागदपत्रांअभावी चालकांना हजारो रुपयांचा दंड भरावा लागला होता. या पार्श्वभूमीवर शिवसेनेच्यावतीने 'आमदार आपल्या दारी', या उपक्रमांतर्गत बुधवारी ऑटोरिक्षा व्यवसाय मार्गदर्शन शिबिर घेण्यात आले.
ऑटोरिक्षा व्यवसाय मार्गदर्शन शिबिर हेही वाचा - परभणीत 'आरटीओ' ने पकडलेल्या ऑटोतून बॅटरी, टेपरेकॉर्डरसह पेट्रोल चोरी गेल्याने खळबळ
शहरातील लक्ष्मीनारायण मंगल कार्यालयात हे शिबिर पार पडले. आमदार डॉ. राहुल पाटील यांच्या संकल्पनेतून हे शिबिर राबवण्यात आले. त्यांच्या हस्ते कार्यक्रमाचे उद्घाटनदेखील करण्यात आले. या शिबिरात आरटीओसह शासकीय योजनांना लागणाऱ्या विविध कागदपत्रांची पूर्तता करण्यात आली. या उपक्रमात साडेपाच हजार ऑटो रिक्षाधारक आणि त्यांच्या कुटुंबियांनी सहभाग घेतला होता.
हेही वाचा - ..नाही तर तुमची धुलाई करायला सांगीन; नितीन गडकरींची अधिकाऱ्यांना तंबी
या शिबिरात ऑटो, रिक्षा चालकांना शिकाऊ परवाना, चारित्र्य प्रमाणपत्र, पीयूसी पावती, परमिटसाठीचा ऑनलाईन फार्म भरणे, बॅच बिल्ला काढण्यासाठी आवश्यक ते सर्व कागदपत्रे उपलब्ध करून देण्यात आली. तसेच ऑटो चालकांच्या कुटुंबियांना उज्वला गॅस, एसटीचे स्मार्टकार्ड, आधार कार्ड, श्रावणबाळ वृद्धापकाळ निवृत्ती वेतन, आदींचा लाभ मिळवून देण्यात आला. तहसील आणि उपप्रादेशिक परिवहन विभागाच्या कर्मचाऱ्यांच्या मार्गदर्शनात हे शिबिर पार पडले.
हेही वाचा - परभणीतील 'त्या' जप्त ऑटो चालकांना 31 डिसेंबरपर्यंत मुदत; परिवहन मंत्र्यांचे आदेश
ऑटोरिक्षा चालकांना प्रत्यक्ष व्यवसाय करताना अनेक अडचणींना तोंड द्यावे लागते. त्यातच शासकीय कागदपत्रांची पूर्तता करताना मोठा त्रास सहन करावा लागतो. या त्यांच्या व्यवसायिक अडचणींवर आज मार्गदर्शन करण्यात आल्याची माहिती ऑटो संघटनेचे अध्यक्ष संभानाथ काळे यांनी दिली. या शिबिरात परभणी शहराप्रमाणेच ग्रामीण भागातील नागरिक मोठया संख्येनं उपस्थित होते.
