सराईत सोनसाखळी चोरास माणिकपूर पोलिसांनी ठोकल्या बेड्या

महिलांच्या गळ्यातील सोनसाखळी चोरी (स्नॅचिंग) करण्या-या सराईत गुन्हेगाराला माणिकपूर पोलिसांनी अटक केली. सुरेंद्र सिंग अजित सिंग नेगी(३८) असे अटक करण्यात आलेल्या आरोपीचे नाव आहे. त्याच्याकडून २ लाख रुपये किंमतीचे ७६ ग्रॅम वजनाचे सोने हस्तगत केले.

पालघर -माणिकपूर पोलिसांनी महिलांच्या गळ्यातील सोनसाखळी चोरी (स्नॅचिंग) करण्या-या सराईत गुन्हेगारास अटक केली. या प्रकरणी माणिकपूर पोलीस ठाण्यात गुन्हा दाखल करण्यात आला आहे.

महिलांच्या गळ्यातील सोनसाखळी चोरीच्या गुन्ह्यांना आळा बसावा, यासाठी वसई पोलिसांनी पथक तयार करुन सोनसाखळी चोरीतील आरोपी सुरेंद्र सिंग अजित सिंग नेगी(३८) याला अटक केली. उपविभागीय पोलीस अधिकारी डॉ. अश्विनी पाटील, माणिकपूर पोलीस ठाण्याचे पोलीस निरीक्षक राजेंद्र कांबळे यांच्या मार्गदर्शनाखाली ही कारवाई करण्यात आली.सुरेंद्र सिंग याला अटक करुन चौकशी केली असता, त्याने माणिकपूर पोलीस ठाण्याच्या हद्दीत सोनसाखळी चोरीचे चार गुन्हे केल्याचे कबुल केले. त्याचा साथिदार आरोपी जाफर शेख ( रा-वाघळे ईस्टेट, ठाणे ) याचा पोलिस शोध घेत आहेत.त्याच्याकडून २ लाख रुपये किंमतीचे ७६ ग्रॅम वजनाचे सोने हस्तगत केले आहे. आरोपी सुरेंद्र सिंग अजित सिंग नेगी हा सराईत गुन्हेगार असून त्याच्यावर यापुर्वी मुंबई पोलीस आयुक्तालयाचे अभिलेखावर ६ , नवी मुंबई पोलीस आयुक्तालयाचे अभिलेखावर ६, तर ठाणे पोलीस आयुक्तालयाचे अभिलेखावर ६, व ठाणे ग्रामीणचे २ असे एकूण २० गंभीर स्वरुपाचे गुन्हे दाखल आहेत.