पालघर- पती हरवल्याचा बनाव करत पोलिसांत तक्रार करून पत्नी व तिच्या प्रियकराने मिळून पतीची हत्या केल्याचा धक्कादायक प्रकार बोईसर येथे उघडकीस आला आहे. अनिल कुमार रावत (३२) असे हत्या झालेल्या व्यक्तीचे नाव आहे. आरोपी पत्नी ममता रावत आणि प्रियकर सोनू (२२) दोघांनाही बोईसर पोलिसांनी अटक केली आहे.
मृत अनिल कुमार रावत हा पालघर येथील एका कंपनीत सुपरवायझरचे काम करत होता. १५ फेब्रुवारी रोजी अनिलची पत्नी ममता हिने बोईसर पोलीस ठाणे गाठत आपला पती २ दिवसांपासून घरी आला नसल्याची तक्रार नोंदवली. याच दरम्यान बोईसर येथील जंगलामध्ये एका अज्ञात इसमाचा मृतदेह पोलिसांना सापडला. मृतदेहाची ओळख पटत नसल्याने शोध घेणे अवघड होते.
काही दिवसांपूर्वीच ममता हिने आपला पती हरविल्याची तक्रार बोईसर पोलिसांत दिली होती. त्यामुळे जंगलात सापडलेल्या मृतदेहाचा व पती हरवल्याच्या तक्रारीचा काही संबंध आहे का ? याची शहानिशा करण्यासाठी पोलिसांनी ममता हिला मृतदेहाची ओळख पटविण्यासाठी बोलावले. यावेळी ममताने हा मृतदेह आपल्या पतीचाच असल्याचे सांगितले. त्यानंतर या प्रकरणी पोलिसांनी अज्ञात आरोपींविरोधात कलम ३०२ आणि २०१ अन्वये गुन्हा दाखल केला.
या हत्येप्रकरणी पोलिसांना अनिलची पत्नी ममतावर संशय होता. तसेच सोनू हा अनिलचा दूरचा नातेवाईक गेल्या ३ महिन्यांपासून त्यांच्या घरी राहण्यास आला होता. त्याच्यावरही पोलिसांचा संशय होता. या ३ महिन्यांदरम्यान ममता आणि सोनू यांच्यात जवळीक वाढली होती. मात्र, त्यांच्या अनैतिक संबंधास पती अनिल याचा अडथळा येत होता. त्यामुळे त्यांच्या अनैतिक संबंधात अडथळा ठरत असलेल्या पती अनिल याच्या हत्येचा दोघांनी मिळून कट रचला होता. हत्या करुन मृतदेह बोईसर येथील जंगलात टाकून दिल्याचे पोलीस तपासात उघड झाले.
