'दिव्यांग क्रिकेट वर्ल्ड सिरीज 2019' जिंकणाऱ्या भारतीय संघाचा कर्णधार विक्रांत केणीचे स्वगृही जल्लोषात स्वागत

इंग्लंड येथे झालेल्या 'दिव्यांग क्रिकेट वर्ल्ड सीरीज 2019' स्पर्धेचे विजेतेपद भारतीय संघाने जिंकले. या विजेत्या संघाचा कर्णधार विक्रांत केणी याचे स्वगृही (तारापूर) येथे मोठ्या जल्लोषात स्वागत करण्यात आले. यावेळी तारापूर परिसरातील नागरिकांनी विक्रांतची भव्य मिरवणूक काढली होती.

पालघर - इंग्लंड येथे झालेल्या 'दिव्यांग क्रिकेट वर्ल्ड सीरीज 2019' विजेत्या भारतीय संघाचा कर्णधार विक्रांत केणी याचे स्वगृही आगमन झाले. तारापूर येथे मोठ्या जल्लोषात त्याचे स्वागत करण्यात आले. यावेळी तारापूर परिसरातील नागरिकांनी विक्रांतची भव्य मिरवणूक काढली होती.

इंग्लंडमध्ये दिव्यांग क्रिकेट वर्ल्ड सीरीज 2019 चे आयोजन करण्यात आले होते. या सीरिजमध्ये इंग्लंड पाकिस्तान, बांगलादेश, अफगाणिस्तान, भारत या पाच संघांचा समावेश होता. या सीरिजचा अंतिम सामना भारत विरुद्ध इंग्लंड या दोन संघामध्ये झाला.

'दिव्यांग क्रिकेट वर्ल्ड सिरीज 2019' जिंकणारा भारतीय संघ

प्रथम फलंदाजी करताना भारतीय संघाने 180 धावा काढत, इंग्लंड संघाला 144 धावात गारद करत या वर्ल्ड सिरीजवर आपले नाव कोरले. भारतीय संघाचा कर्णधार विक्रांत केणी हा तारापूर जवळील कांबोडा या गावात मच्छीमार कुटुंबातील आहे. त्याने आपल्या अपंगत्वावर मात करून स्वतःच्या जिद्दीवर क्रिकेटमध्ये यश मिळवले. विक्रांत केणीच्या या यशानंतर सर्वत्र त्याचे कौतुक होत असून, त्याच्यावर अभिनंदनाचा वर्षाव होत आहे.