पालघर - परीक्षेच्या तयारीसाठी राजस्थानमधील कोटा येथे गेलेले 52 विद्यार्थी लॉकडाऊनमुळे महिनाभरापासून अडकून पडले होते. राज्य शासनाच्या प्रयत्नानंतर अखेर या विद्यार्थ्यांना परत आणण्यात यश आले असून शुक्रवारी रात्री उशिरा हे सर्व विद्यार्थी बसने पालघर येथे दाखल झाले.
राजस्थानमधील कोटा येथे पालघरमधील ५२ विद्यार्थी अडकले होते. त्यानंतर राज्य शासनाने सातत्याने राजस्थान सरकारचा पाठपुरावा केल्यानंतर कोटाहून धुळे-नाशिक मार्गे एसटीने पालघरमध्ये आणण्यात आले. यामधील १८ विद्यार्थी पालघर तालुक्यातील बोईसर परिसरातील, तर काही वसई तालुक्यातील आहेत. महिनाभराच्या प्रतीक्षेनंतर पालघरला परतलेल्या या सर्व विद्यार्थ्यांच्या चेहऱ्यावर आनंद दिसत होता. खबरदारीचा उपाय म्हणून परतलेल्या सर्व विद्यार्थ्यांची पुन्हा वैद्यकीय तपासणी करण्यात येणार आहे. तसेच त्यांना 14 दिवस विलगीकरण करण्यात येणार आहे.
राज्य शासनाच्या प्रयत्नाने या विद्यार्थ्यांना परत आणण्यात यश आले. त्यामुळे मुख्यमंत्री उद्धव ठाकरे, परिवहन मंत्री अनिल परब यांच्यासह पालघरमध्ये आणण्यासाठी प्रयत्न केलेल्या जिल्हा परिषदेच्या अध्यक्ष भारती कामडी यांचे विद्यार्थ्यांनी सर्वांचे आभार मानले आहेत.
